Փաստ ինֆո

Դա բացարձակապես չի համապատասխանում իրականությանը։ Ճեպազրույցի ժամանակ ՀՀ վարչապետ Նիկոլ Փաշինյանն այսկերպ արձագանքեց հարցին՝ ինչու կառավարությունը մասնավոր բուժհիմնարկներին նախապես չի առաջարկել միանալ կորոնավիրուսի դեմ պայքարին և միայն վերջին օրերին են նրանք նման առաջարկություն ստացել։

«Մասնավոր «Էրեբունի» ԲԿ-ն շատ վաղուցվանից է ներգրավված, մասնավոր «Արմենիա» ԲԿ-ն, «Աստղիկ» ԲԿ-ն վաղուցվանից են ներգրավված։ Խնդիրն այստեղ հակահամաճարակային կանոնների պահպանման մեջ է, որովհետև կառավարությունը, առողջապահության նախարարությունն այս հարցը դիտարկելիս շատ կարևոր է համարում, որ մյուս առողջապահական հատվածները, բաժինները հնարավորինս մեկուսացված լինեն կորոնավիրուսային բաժիններից, որպեսզի հիվանդների շրջանում վարակը չտարածվի։ Ինչպես Հայաստանում, այնպես էլ աշխարհի բոլոր երկրներում կորոնավիրուսային բաժանմունքները համարվում են վարակի տարածման ինտենսիվ աղբյուր»,-ասաց Նիկոլ Փաշինյանը։

Վարչապետը, անդրադառնալով ԵՊԲՀ հոգաբարձուների խորհրդի նախագահ Վահան Արծրունու գրառմանը, ասաց, որ հրապարակումից երեք օր առաջ այդ թեման արդեն լուծված է եղել, և նախարարությունը համապատասխան բուժհաստատության հետ որոշում է կայացրել. «Առողջապահության նախարարությունը բոլոր բժշկական կենտրոնների հնարավորությունները գույքագրել է և ըստ անհրաժեշտության որոշում է կայացրել։ Երեկվանից բաց հայտարարություն ենք տվել, որին կարող են արձագանքել։ Երբ դրան արձագանքներ լինեն, ըստ այդմ կարող ենք գնահատել իրավիճակը»,-ասաց վարչապետը։

Վերջինս նկատեց՝ Հայաստանում կորոնավիրուսի համավարակի հետ կապված դաշտը կարելի է բաժանել երկու մասի. Մարդիկ, որոնք շահագրգռված են, որ կորոնավիրուսի վարակը հնարավորինս տարածվի ու վատ ընթացք ստանա. «Դրանք հայտնի քաղաքական շրջանակներն են։ Ուզում եմ ասել, որ այդ քաղաքական շրջանակները կորոնավիրուսի համավարակի ավարտի հետ ավարտվելու են։ Այսինքն՝ նրանք ավարտված են, բայց այդքան էլ լավ չեն հասկանում, որ ավարտված են։

Նրանք, ովքեր լավ չեն հասկանում և հասկանալու հետ կապված օբյեկտիվ, բնածին պրոբլեմներ ունեն, մենք նրանց տեսանելի և հասկանալի կերպով կբացատրենք և այս անգամ նրանք ցկյանս կհասկանան ու այլևս չեն փորձի քիթները խոթել այնտեղ, որտեղ իրենց տեղը չի։ Բոլորն ըստ ընթացակարգերի կհայտնվեն իրենց արժանի տեղերում։ Կառավարության նկատմամբ սաբոտաժային քայլերն արժանանալու են գնահատականի և այդ գնահատականների հեղինակներն արժանանալու են կոնկրետ գնահատականների։ Նրանք նետվելու են Հայաստանի քաղաքական պատմության աղբանոցը։ Նրանք այնտեղ են դե ֆակտո և այնտեղ լինելու փաստը դե յուրե կարձանագրվի»,-ասաց Նիկոլ Փաշինյանը։

Մանրամասները՝ տեսանյութում

Աղբյուր` Փաստինֆո