Փաստ ինֆո

Կարեն Դեմիրճյանի անվան մարզահամերգային համալիրում մահճակալներ տեղադրելուց բացի անհրաժեշտ են մասնագետներ և բժշկական սարքավորումներ։ Առանձնապես լավ չեմ պատկերացնում այնտեղ մահճակալներ տեղադրելու իմաստն այն դեպքում, երբ բազմաթիվ բուժհիմնարկներ կան, որոնք պետք է հնարավորինս նախապատրաստվեին ու մարդկանց սպասարկեին։ «Փաստինֆո»-ի հետ զրույցում այս մասին ասաց համաճարակաբան Ռուբեն Հովհաննիսյանը։

Նշենք, որ վերջին շրջանում պատկան մարմինների կողմից բազմիցս լսում ենք, որ հիվանդանոցներում տեղ չկա։ Շաբաթ օրը տեղի ունեցած ճեպազրույցի ժամանակ այդ մասին ասաց նաև ՀՀ վարչապետ Նիկոլ Փաշինյանը՝ նշելով, որ 200 մարդ սպասում է հոսպիտալիզացվելու իր հերթին։ Փորձեցինք հասկանալ, թե ինչու այս դեպքում չի օգտագործվում համալիրը, որտեղ դեռևս արտակարգ դրություն հայտարարելու սկզբնական շրջանում տեղադրվել էին մահճակալները։ Համաճարակաբան Ռուբեն Հովհաննիսյանն ասաց. «Նախ պետք է մասնագետներին այնտեղ տանել, իրենց աշխատանքի համար հնարավորություններ ստեղծել։ Համալիրում մահճակալներ տեղադրելը գնահատում եմ որպես ցուցադրական մի բան, որ տեսեք մենք աշխատում ենք»,-ասաց համաճարակաբանը։

Վերջինս կարծում է՝ այս ամբողջ գործողությունների շղթայում ճիշտ, ռեալ պլանավորում չկա, կայացվում են առօրեական որոշումներ՝ ելնելով օրվա իրողություններից այն դեպքում, երբ պանդեմիայի ժամանակ պետք է լինի հստակ պլանավորում։ Գործողությունների ծրագիրն առնվազն 2-3 ամսվա կտրվածքով պետք է հստակ մշակված լինի, ինչն այս դեպքում համաճարակաբանը չի տեսնում։

Անդրադառնալով դիմակների օգտագործման արդյունավետությանը, Ռուբեն Հովհաննիսյանն ասաց, որ դրանք ինչ-որ չափով, իհարկե, նվազեցնում են վարակվելու հավանականությունը, սակայն բացօթյա տարածքում դրա անհրաժեշտությունը չի տեսնում։ Փոխարենը կարծում է՝ դա լրացուցիչ այլ խնդիրների պատճառ կարող է դառնալ. «Այն նաև նվազեցնում է զգոնությունը և ճիշտ դիմակ կրելու կուլտուրան։ Այսինքն` դիմակի ամբողջ իմաստը կորում է այն պարագայում, երբ ամբողջ օրը կեղտոտ դիմակով ման են գալիս ու իրենց պաշտպանված զգում, այնինչ այս պարագայում արդեն այդ դիմակը բավական քիչ բանից է, որ պաշտպանում է։ Ավելին այն նաև այլ խնդիրներ է առաջացնում։ Եղել է դեպք, երբ մարդը գլխապտույտ է ունեցել, տեղափոխել են հիվանդանոց, ստուգել և պարզվել է, որ թթվածնային քաղցի տիպիկ նշաններ են նրա մոտ։ Այսինքն` շատ-շատ բաներ կան։ Դիմակների համատարած ոչ ճիշտ կրելու և ոչ ճիշտ վայրում այն դնելու բացասական էֆեկտները հետագայում կտեսնենք, երբ այլ պաթոլոգիաները սկսեն վիճակագրորեն վերլուծվել»,-ասաց Ռուբեն Հովհաննիսյանը։

Ըստ նրա՝ ճիշտ չէ ստեղծված իրավիճակում մարդկանց մեղադրել, երբ երկրում մասնագիտական ողջ ներուժը չի օգտագործվում և պետության կողմից էլ ճիշտ պլանավորում չի իրականացվում։ Հիվանդանոցային ու մասնագետների ներուժ ունենք, փոխարենը կազմակերպչական բաց կա. «Միանշանակ ներուժ ունենք։ Բազմաթիվ մասնագետների հետ եմ խոսել, որոնք ինձ նման ներգրավված չեն եղել ոչ մի գործընթացում։ Կոնկրետ իմ կողմից ցանկություն եղել է, բայց քանի որ ՁԻԱՀ-ի կենտրոնի աշխատակազմի և նախարարի միջև հակասություն եղավ, որի արդյունքում աշխատանքից դուրս մնացինք, այդ աշխատանքներում էլ այդպես էլ չներգրավվեցինք»,-ասաց Ռուբեն Հովհաննիսյանը։

Հեղինակ՝ Հասմիկ Կոշկարյան

Աղբյուր` Փաստինֆո