Փաստ ինֆո

Դատավոր Դավիթ Գրիգորյանին վերագրվող գործողություններում բացակայում է հանրության համար վտանգավոր արարքը, հետեւաբար այն հանցագործություն չի համարվում։ Նման եզրահանգման է եկել Երեւանի ընդհանուր իրավասության դատարանը։

Ինչպես արդեն տեղեկացրել ենք՝ հունիսի 5-ին դատարանը գործի վարույթը կարճել է երկու հիմքով՝ քրեադատավարական իրավունքի խախտման հիմքով, ինչպես նաեւ ՀՀ քրեական օրենսգրքի 18-րդ հոդվածի հիմքով։ Այն է՝ հանցագործություն է համարվում մեղավորությամբ կատարված հանրության համար վտանգավոր արարքը, իսկ եթե այն իր նվազ կարեւորության պատճառով հասարակական վտանգավորություն չի ներկայացնում, ուրեմն հանցագործություն չէ։

«Փաստինֆո»-ի հետ զրույցում դատավոր Դավիթ Գրիգորյանը նշեց, որ դատարանի գնահատականն իրենց համար անսպասելի չէր, քանի որ նախկինում բազմիցս բարձրաձայնել են այդ մասին, ավելին՝ գոյություն ունի վճռաբեկ դատարանի նախադեպային որոշում։ «Քրեական օրենսգրքի 18-րդ հոդվածի հիմքով հանցագործություն է դիտվում բացառապես այն արարքը, որը հանրային վտանգավորություն ունի։ Այսինքն՝ պետք է հետևանք լինի, բայց մեզ մոտ հետևանք չկա»,-ասաց Գրիգորյանը։

Նկատենք, որ քրեադատավարական իրավունքի խախտման մասին բարձրաձայնել էր նաեւ վերաքննիչ դատարանն ավելի վաղ՝ արձանագրելով, որ Դավիթ Գրիգորյանի նկատմամբ քրեական հետապնդում սկսելիս չի հաղթահարվել նրա գործառութային անձեռնմխելիությունը։ Արդյոք այս ակնհայտ խախտումների պարագայում դատախազության համար տեսանելի չէր, որ գործի վարույթը ենթակա է կարճման ու դատարանում ապագա չի ունենալու՝ «Փաստինֆո»-ի հարցին ի պատասխան Դավիթ Գրիգորյանն արձանագրեց, որ այդ խախտումները չէին կարող տեսանելի չլինել դատախազությանը, որովհետև նույն ՀՔԾ-ում մեկ այլ դեպքով հետաքննիչի վերաբերյալ քրեական գործի վարույթը կարճվել է, քրեական հետապնդումը դադարեցվել հենց նշված հիմքով, այսինքն՝ հանրային վտանգավորության նվազ կարևորության և հետևանք չունենալու։

«Այդ նույն որոշման՝ գործի վարույթի կարճման և քրեական հետապնդումը դադարեցնելու մասին, օրինականությունն ստուգվել ու հաստատվել է ՀՀ գլխավոր դատախազության նույն վարչության դատախազներից մեկի կողմից, ոնց կարող էին տեղյակ չլինել»,- ասաց Գրիգորյանը՝ նշելով, որ հարցի իրական հասցեատերը դատախազությունն է, թե ինչու են որոշել խախտումներով գործն ուղարկել դատարան։

Աղբյուր` Փաստինֆո