Փաստ ինֆո

Օրերս «Հայրենիք» կուսակցության նախագահ Արթուր Վանեցյանը խորհրդարանական ընդդիմությանը կոչ էր արել ստեղծել քննիչ հանձնաժողով և քաղաքական գնահատական տալ համաճարակի դեմ պայքարում վարչապետի, կառավարության գործողություններին։

Հասկանալու համար արդյոք խորհրդարանական ընդդիմությունը պատրաստվում է քննիչ հանձնաժողով ստեղծելու նախաձեռնությամբ հանդես գալ, թե ոչ, «Փաստինֆո»-ն զրուցեց ԱԺ «Բարգավաճ Հայաստան» խմբակցության քարտուղար Արման Աբովյանի հետ։

- «Բարգավաճ Հայաստան» խմբակցությունը քննարկո՞ւմ է քննիչ հանձնաժողով ստեղծելու հարցը և արդյոք այս հարցի վերաբերյալ համագործակցու՞մ եք «Լուսավոր Հայաստան» խմբակցության հետ։

-  Այս պարագայում առայժմ ոչ մի գրություն կամ պաշտոնական փաստաթուղթ չեմ ստացել, բայց մենք շատ դինամիկ քաղաքական ընթացքների մեջ ենք։ Խմբակցության ներսում առայժմ հարցի քննարկում չի եղել, բայց հարկ եղած դեպքում, իհարկե, քննարկելու ենք։

-  Ի՞նչ նկատի ունեք դինամիկ գործողություններ ասելով։

-Ոչ թե դինամիկ գործողություններ, այլ քաղաքականությունն առհասարակ դինամիկ է։ Նորմալ աշխատանքային գործընթաց է, ոչ մի արտառոց բան չկա։ Առայժմ քննարկում չենք ունեցել, սակայն յուրաքանչյուր դեպքում, յուրաքանչյուր ընթացք, որը կնպաստի, որ այս իրավիճակից հնարավորինս շուտ և նորմալ ձևի դուրս գանք, իհարկե, մեր կողմից ոչ մի ինստրումենտ չի անտեսվի։

-Քննադատում եք այս ընթացքում իշխանությունների գործողությունները, հայտարարությունները։ Որպես խորհրդարանական ընդդիմություն ե՞րբ կսկսեք կոնկրետ գործողություններ իրականացնել՝ առաջնորդվելով ստեղծված իրավիճակի հետ կապված Ձեր մտահոգություններով։

-Մենք միշտ էլ արձագանքել ենք և՛ մինչև մեր հայտարարությունը, և՛ հայտարարությունից հետո։ Մեզ մոտ, ըստ էության, այդ առումով ոչինչ չի փոխվել։ Մենք միշտ արձագանքել ենք, կլինի դա թե՛ հանրային տարբեր հարթակներում, թե՛ օրինագծերի ձևով։ Այս պահին բավականին ակտիվ  հանդիպումներ ենք ունենում բոլոր մարդկանց, քաղաքական ուժերի հետ։ Մենք բաց ենք բոլորի համար, սակայն այն քաղաքական ուժերը, անձինք, մարդիկ, որոնք ժողովրդի կողմից ընդունելի չեն, մեզ համար էլ ընդունելի չեն։ Գոյություն ունի շատ ծանր իրավիճակ, և այս իրավիճակի ելքն արդեն իսկ հնչեցրել ենք մեր հայտարարության մեջ։ Կարծում ենք, որ կառավարությունը տապալել է գրեթե ամեն ինչ և ամենակարևորն այսօր տեսնում ենք։

Ընդդիմությունը կամ կառավարությունը կարող է մտնել քաղաքական պոլիմիկայի մեջ, բայց ճշմարտությունը հետևյալն է՝ մենք ունենք ահագնացող ճգնաժամ թե՛ տնտեսական, թե՛ կորոնավիրուսի հետ կապված։ Ակնհայտ է, որ ՀՀ քաղաքացիները չափազանց մտահոգ են ստեղծված իրավիճակից։ Մենք երբեք լոկ չենք քննադատել  պարզապես քննադատելու համար։ Միշտ ելքեր ենք առաջարկել, բայց ցավոք իշխանությունները խուլ են, չեն լսում, չեն ուզում լսել։

- Իշխանություններին ավելի կառուցողական դաշտ բերելու համար չե՞ք կարծում, որ պետք է արագացնել քննիչ հանձնաժողով ստեղծելու գործընթացը։

Բոլոր գործիքակազմը, որը թույլ կտա Ձեր մատնանշած բոլոր ընթացքները, մեր կողմից չի անտեսվի։ Առայժմ հենց կոնկրետ այս հարցի շուրջ քննարկում ֆրակցիայում չենք ունեցել, բայց հավատացնում եմ, որ մենք ոչ մի ձևով կաշկանդված չենք նույն այդ հանձնաժողովը նախաձեռնելու և մասնակցելու համար։ Այստեղ պարզապես խնդիրն այն է, որ առայժմ այս փուլում մենք հիմնականում անցկացնում ենք այդ հանդիպումները և զրույցները։ Մեզ համար շատ կարևոր է այդ ընդհանուր հանրային կարծիքը, հանրային խնդրի շուրջ ծավալվող քննարկումները,  մեր և իրենց տեսակետները հասկանալը։ Այսօր մենք ունենք շատ կարևորագույն խնդիր, որ այս ստեղծված իրավիճակը պետք է շտկվի։

Հեղինակ՝ Հասմիկ Կոշկարյան

Աղբյուր` Փաստինֆո