Փաստ ինֆո

Երևանի ընդհանուր իրավասության դատարանում՝ դատավոր Մեսրոպ Մակյանի նախագահությամբ, «Կոշ» ՔԿՀ նախկին պետ Լյովա Բաղդասարյանի և մյուսների գործով դատական նիստը հետաձգվեց։ Մինչև դատական նիստի հետաձգումը նախագահող դատավորը հետաքրքրվեց, թե արդյոք ամբաստանյալները ցանկանում են, որ իրենց փաստաբանները շարունակեն պաշտպանել իրենց շահերը նաեւ դատարանում, ինչին նրանք դրական արձագանքեցին։ Դատավոր Մեսրոպ Մակյանը հայտարարեց, որ դատական նիստից րոպեներ առաջ դիմում է ստացել պաշտպան Լուսինե Զեյնալյանից առ այն, որ չի կարող ներկայանալ դատական նիստին՝ իր տատիկի մահվան պատճառով։ Զեյնալյանը խնդրել է համարել իր բացակայությունը հարգելի և հետաձգել դատական նիստը։ Հաշվի առնելով հանգամանքը, որ ամբաստանյալը պնդում է, որ իր շահերը պաշտպանի Զեյնալյանը և նրա բացակայությունն առերևույթ հարգելի է համարվում, դատարանը որոշում կայացրեց դատական նիստը հետաձգելու մասին։

Հաջորդ դատական նիստը նշանակվել է հունիսի 22-ին՝ ժամը 10։30-ին։

Նշենք, որ սույն գործով Լյովա Բաղդասարյանից բացի մեղադրյալի կարգավիճակում են Հայկ Կարապետյանը, ով մեղադրվում է Լյովա Բաղդասարյանին կաշառք տալու մեջ և Արթուր Հովհաննիսյանը, ով մեղադրվում է կաշառք տալուն օժանդակելու մեջ:

Լյովա Բաղդասարյանին մեղադրանք է առաջադրվել ՀՀ քրեական օրենսգրքի 311-րդ հոդվածի 1-ին մասով, ՀՀ ՔՕ 314-րդ հոդվածի 1-ին մասով և նույն օրենսգրքի 179-րդ հոդվածի 1-ին մասի 3-րդ կետով՝ կաշառք ստանալու, պաշտոնատար անձի կողմից շահադիտական նպատակներով պաշտոնեական փաստաթղթերում ակնհայտ կեղծ տեղեկատվություն ներառելու և առանձնապես խոշոր չափերով յուրացում կատարելու համար:

Հայկ Կարապետյանին մեղադրանք է առաջադրվել ՀՀ քրեական օրենսգրքի 312-րդ հոդվածի 2-րդ մասով՝ խոշոր չափերով կաշառք տալու համար, իսկ Արթուր Հովհաննիսյանին՝ ՀՀ քրեական օրենսգրքի 38-312-րդ հոդվածի 2-րդ մասով՝ խոշոր չափերով կաշառք տալուն օժանդակելու համար:

Ըստ նախաքննական մարմնի՝ Լյովա Բաղդասարյանը մեղադրվում է քրեակատարողական հիմնարկում ազատազրկման ձևով պատիժ կրող դատապարտյալների օգտին ակնհայտ ապօրինի անգործության , այն է՝ ռեժիմի խախտման դեպքերը չարձանագրելու, շրջանառությունն արգելված իրեր հայտնաբերելուն ուղղված միջոցառումներ չիրականացնելու, որոշ դատապարտյալների համար արտոնյալ պայմաններ ստեղծելու համար, քրեական հեղինակություն վայելող այսպես կոչված՝ «զոն նայող» դատապարտյալ Հայկ Կարապետյանի, ինչպես նաև քրեական հեղինակություն վայելող Արսեն Հովհաննիսյանի կազմակերպմամբ հավաքագրված գումարներից՝ ՀՀ ԱՆ «Կոշ» ՔԿ հիմնարկի նախկին դատապարտյալ Արթուր Հովհաննիսյանի միջոցով, 2019թ․ սեպտեմբերի 17-ին Երևան քաղաքի Նորք-Մարաշ վարչական շրջանի Արմենակյան փողոցի 197 հասցեում գործող ավտոլվացման կետում ստացել է խոշոր չափերով՝ 700,000 ՀՀ դրամ կաշառք, որից հետո բռնվել է ՀՀ ԱԱԾ աշխատակիցների կողմից։

Նշենք, որ գործով մյուս մեղադրյալ Հայկ Կարապետյանը դատապարտված է եղել սպանության և ապօրինի զենք-զինամթերք կրելու համար և համարվում է քրեական հեղինակություն կամ ինչպես ասում են՝ զոն նայող դատապարտյալ: Վերջինս, ըստ մեղադրանքի, իր և նշված հիմնարկում ազատազրկման ձևով պատիժ կրող դատապարտյալների օգտին ակնհայտ ապօրինի անգործության, այն է՝ ռեժիմի խախտման դեպքերը չարձանագրելու, շրջանառությունն արգելված իրեր հայտնաբերելուն ուղղված միջոցառումներ չիրականացնելու, որոշ դատապարտյալների համար արտոնյալ պայմաններ ստեղծելու համար, իր և այլոց կազմակերպմամբ հավաքագրված գումարներից նախկին դատապարտյալ Արթուր Հովհաննիսյանի միջոցով ստացել է խոշոր չափերով՝ 700,000 ՀՀ դրամ կաշառք է տվել վերը նշված քրեակատարողական հիմնարկի պետ Լյովա Բաղդասարյանին։

Հեղինակ՝ Իզաբել Սահակյան

Աղբյուր` Փաստինֆո