Փաստ ինֆո

Այս պահի դրությամբ 403 մարդ գտնվում է ծանր վիճակում, 94 մարդ՝ ծայրահեղ ծանր վիճակում է։ Այս մասին ճեպազրույցի ժամանակ ասաց ՀՀ առողջապահության նախարար Արսեն Թորոսյանը՝ նկատելով, որ վերջին օրերին թիվը կայուն է։

«Ծավալների մեծացման քաղաքականությունը, որը վարում ենք, բնավ չպետք է փոխարինի հակահամաճարակային կանոնների պահպանմանը, հակառակը պետք է լրացնեն իրար, որպեսզի կարողանանք կառավարելի կերպով առաջ շարժվել։ Տեղի են ունենում ծավալման նոր աշխատանքներ։ Մինչ այս ծավալման երկրորդ փուլը, մենք ունեցել ենք ծավալման առաջին փուլ, որն անկախ Հայաստանի ընթացքում աննախադեպ է եղել։ Նման մոբիլիզացիա առողջապահական համակարգը երբեք չի ունեցել։ Այսինքն` այն ծավալված 2000 մահճակալներն արդեն լուրջ աշխատանք են եղել ծավալման ուղղությամբ։ Մենք միշտ ունեցել ենք ծավալման ընդլայնման քաղաքականություն, որն իր մեջ ներառելու է նաև մարզային որոշ բժշկական հաստատություններ, որի ուղղությամբ շարժվում ենք թելադրված իրավիճակով։

Օրինակ որոշում է կայացվել հետևյալ բժշկական կենտրոնների ծավալման, դրանք են՝ Վեդիի ԲԿ-ն մոտ 100 մահճակալով, Սպիտակի ԲԿ-ն 100 մահճակալով։ Դրանց մեջ ներառված են նաև թթվածնաթերապիայի համար մահճակալներ, քանի որ փորձը ցույց տվեց, որ կորոնավիրուսով հիվանդ մեր քաղաքացիներն ավելի շատ կարիք ունեն պարզապես թթվածին շնչելու, քան թե արհեստական շնչառության վրա լինելու։Այսինքն` եթե կարողանում ենք ապահովել բավարար թթվածնաթերապիա, վաղ շրջանից կանխարգելում ենք նրանց բարդացումը։ Ծավալվելու որոշում է կայացվել նաև Դիլիջանի ԲԿ-ի մասով, որն ունի 55 մահճակալ, ևս 5 ռեանիմացիոն մահճակալ, ինչպես նաև Մարտունի ԲԿ-ի բաժանմունքի՝ 40 մահճակալ ծավալով։ Երևանում նույնպես ծավալման աշխատանքները շարունակվում են։

Ունենք նոր ռեանիմացիոն մահճակալներ «Սուրբ Աստվածամայր» ԲԿ-ի ինֆեկցիոն մասնաճյուղում։ Եվս մեկ մասնավոր բժշկական կենտրոնի ներգրավում ունենք։ Խոսքը «Արմենիա» ԲԿ-ի մասին է, որտեղ այսօր արդեն սկսված քննարկումների արդյունքում հավանաբար կծավալվի 50 մահճակալ միջին ծանրության դեպքերի համար և 8 մահճակալ ծայրահեղ ծանր և ծանր դեպքերի համար »,-ասաց Արսեն Թորոսյանը՝ ընդգծելով, որ խոսքը մոտ 350 մահճակալի մասին է։

Աղբյուր` Փաստինֆո