Փաստ ինֆո

«Իրազեկ քաղաքացիների միավորման» ծրագրերի համակարգող Դանիել Իոաննիսյանի եւ ոստիկանության գնդապետ Սայաթ Շիրինյանի միջեւ նախօրեին արձանագրված միջադեպը գրգռեց մարդկանց մի զգալի հատվածին և տրամադրեց պարետատան ընդունած որոշումներից մեկի դեմ։ «Փաստինֆո»-ի հետ զրույցում նման կարծիք հայտնեց «Իրավական ուղի» ՀԿ համահիմնադիր Ռուբեն Մելիքյանը։

Հիշեցնենք՝ Դանիել Իոաննիսյանը երեկ Երեւանում հակահամաճարակային կանոնների հսկման ու աջակցման ակցիաներ է իրականացրել՝ ոստիկանի ուղեկցությամբ։ Համացանցում տարածված տեսանյութում տեսանելի է, թե ինչպես է նա մոտենում ոստիկանության լրատվական ծառայության նախկին պետ, գնդապետ Սայաթ Շիրինյանին եւ բացատրություն պահանջում իր իսկ ավտոտնակում միայնակ գործ անելիս դիմակ չկրելու համար, իսկ ոստիկանը լուռ հետեւում էր բանավեճին, անգամ մի կողմ գնում՝ թույլ տալով, որ տեսագրեն բանավեճը։ Սայաթ Շիրինյանը պահանջում էր նախ՝ չհատել իր սեփականությունը հանդիսացող տարածքի սահմանը, ապա նաեւ պահպանել սոցիալական հեռավորություն, Դանիել Իոաննիսյանն էլ իր հերթին փորձում էր ապացուցել, թե պարետի որոշմամբ դիմակ կրելը պարտադիր է ՀՀ ամբողջ տարածքում, անգամ տանը:

«Օգտակարն ու ցուցադրականը, արդյունավետն ու անարդյունավետը, իրավական գիտելիքն ու կամայականությունն այնքան են իրար խառնվել, որ արդեն շատ դժվար է դառնում հստակ գնահատականներ տալ,-ասում է իրավապաշտպանն ու հավելում,- հստակ կարող եմ ասել, որ Դանիել Իոաննիսյանը սխալ էր այս միջադեպում։ Անձը՝ պարոն Շիրինյանը տվյալ պահին գտնվում էր ոչ հանրային բաց վայրում, որովհետև անձին պատկանող ավտոտնակը հանրային բաց վայր համարվել որևէ կերպ չի կարող։ Արդյունքում, այդ միջադեպը կարելի է համարել վատ պատմություն՝ շատ վատ հետևանքներով, որովհետև որպես արդյունք համավարակի պիկ օրերին այն գրգռեց մարդկանց մի զգալի հատվածին և տրամադրեց պարետատան ընդունած որոշումներից մեկի դեմ»։

Իրավական ո՞ր կարգավորումով էր Դանիել Իոաննիսյանին ուղեկցում ոստիկանության կապիտանը հարցին ի պատասխան իրավապաշտպան Ռուբեն Մելիքյանը շատ անհասկանալի որակեց ուղեկցող կապիտանի ներկայությունը. «Ես չգիտեմ, թե ինչպես էր այդ ոստիկանն այստեղ հայտնվել և որքան հասկացա՝ ոստիկանները առհասարակ բոլոր տեղերում ուղեկցում էին այդ խմբին։ Ես այստեղ լուրջ խնդիր եմ տեսնում, որովհետև, եթե օրինակ ինչ – որ մեկը հայտարարի, որ ինչ որ ժամի հայտնվելու է մի որևէ վայրում և նույն խնդրով հանդիպելու է մարդկանց հետ, ինձ մոտ հարց կծագի՝ իսկ ոստիկանը նրան ուղեկցելո՞ւ է, թե դա վերապահված է միայն շատ սահմանափակ թվով անձանց, ովքեր մեր երկրում պալատական իրավապաշտպանների կարգավիճակ ունեն։ Վերադառնալով այդ էպիզոդին պետք է ընդգծեմ, որ ինձ մոտ հստակ տպավորություն էր, որ այդ ոստիկանը բառացիորեն գտնվում էր Դանիել Իոաննիսյանի վերահսկողության և «հրամանատարության» տակ և լիարժեք կերպով ենթարկվում էր նրան»։

Մեր այն դիտարկման, թե ՀՀ ոստիկանության հասարակայնության հետ կապի և լրատվության վարչության պետ Աշոտ Ահարոնյանը ոստիկանի ուղեկցումն արդեն իսկ գնահատել է որպես հասարակական կարգի պահպանմանն ուղղված աշխատանք, Ռուբեն Մելիքյանն ուղղակի ծիծաղելի պատասխան համարեց. «Ստացվում է, որ մի տեղում ոստիկանը գետնին է պառկեցնում քաղաքացուն, մյուս տեղում հասարակական կարգ է պահպանում այնտեղ, որտեղ ակնհայտ շոուի էլեմենտներ կան, որն իմ պատկերացմամբ ամենևին արդյունավետ գործելաոճ չէ»։

Անդրադառնալով այն հարցին, որ հայտնի տեսանյութի մեջ ոստիկանության գնդապետ Սայաթ Շիրինյանը պնդում է, թե ավտոտնակը համարվում է իր տան անբաժանելի հատվածը, հետևաբար՝ նաև իր տունը, իրավապաշտպան Ռուբեն Մելիքյանը մեկնաբանում է՝ հավանաբար տվյալ դեպքում Սայաթ Շիրինյանը մեջբերել է քրեական դատավարության օրենսգիրքը, իսկ քրեական դատավարության օրենսգրքով և տեսանկյունից, այո, ավտոտնակը, ավտոմեքենան, աշխատասենյակը իրավական ռեժիմով հավասարեցված են բնակարանին. «Սայաթ Շիրինյանը տվյալ պարագայում բոլոր առումներով ճիշտ է, որովհետև մենք գործ չունենք հանրային բաց տարածքի հետ, մարդը գտնվել է իր ավտոտնակում և անձի սեփական ավտոտնակը հանրային բաց տարածք համարվել չի կարող»։

Հանրային վեճի վերածված հանդիպումից հետո «Իրազեկ քաղաքացիների միավորման» ծրագրերի համակարգող Դանիել Իոաննիսյանը որոշեց սոցիալական ցանցերում կասկածի տակ դնել գնդապետ Սայաթ Շիրինյանի գույքի ծագումնաբանությունը, ինչը իրավապաշտպան Ռուբեն Մելիքյանը օրինաչափ համարեց. «Տարրական այնպիսի զավեշտալի հարցից սկսած, ինչպիսին երեկվա միջադեպն էր վերջացրած շատ ավելի լուրջ հարցերով՝ այս ամենը մահակ է, որ կիրառվում է իշխանությունների կողմից, այդ թվում նաև քաղաքական ուժին սերտաճած պալատական իրավապաշտպան Դանիել Իոաննիսյանի կողմից։ Այս տեսանկյունից շատ բնական և սպասելի ձեռագիր էր, և ես կզարմանայի, եթե Դանիել Իոաննիսյանը հանկարծ նման հայտարորություն չաներ»։

Հեղինակ՝ Նվարդ ՄԱԱՆՎԵԼՅԱՆ

Աղբյուր` Փաստինֆո