Փաստ ինֆո

Երբ Առողջապահության համաշխարհային կազմակերպությունը կորոնավիրուսի համաճարակ էր հայտարարում, Հայաստանում դեռ ձեռք էին առնում այդ համաճարակը։ Անլրջությունը սերմանվեց, հիմա չենք կարողանում մեր քաղաքացիներին բացատրել, որ սա լրջագույն խնդիր է։ Լրագրողների հետ զրույցում այս մասին ասաց ԱԺ «Լուսավոր Հայաստան» խմբակցության պատգամավոր Մանե Թանդիլյանը։

«Չենք կարողանում քաղաքացիներին համոզել ու բացատրել, որ լրջագույն խնդիր է, կրեն դիմակները, ախտահանիչ միջոցներ օգտագործեն, սոցիալական հեռավորություն պահեն և դադարեն այդ հարցը տալ՝ արդյոք սա օգնում է։Չի օգնում, նվազեցնում է, կլինի՞ այդ հարցի մասին մտածեք դիմակ կրելով սիրելի հայրենակիցներ։ Այդ անլրջությունը, որ սահմանվել է, թե բա դինոզավրի գրիպ ու մինչև կպարզեին՝ կորոնավիրուսն ում շունն է, եկավ հասավ բոլորիս դռները»,-ասաց Մանե Թանդիլյանը՝ հայրենակիցներին հորդորելով իրավիճակին լուրջ վերաբերվել, ավելի լուրջ, քան կառավարությունն է վերաբերվել։

Անդրադառնալով Գլխավոր շտաբի պետի որդու հարսանիքին՝ Մանե Թանդիլյանն ասաց, որ փորձելու են ամեն ինչ անել, որպեսզի օր առաջ հաղթահարենք համավարակը, որից հետո որևէ մեկը քաղաքական պատասխանատվությունից չի խուսափի. «Ուզում եմ քաղաքացիներին խնդրել, որ պահպանեն կանոնները։ Եթե շտաբի պետը չի պահպանում, ես ուզում եմ, որ մեր քաղաքացիներն ավելի լուրջ լինեն, քան այսօրվա կառավարությունն է։ Ավելի գիտակից, ավելի ողջամիտ ու բանիմաց։ Մարդու միջին վիճակագրական տրամաբանությունը հուշում է, որ եթե վարակն ասիմպտոմ է, ուրեմն դիմացինը, որևէ մեկը չգիտի մյուսի վարակված լինելու, անգամ իր վարակված լինել-չլինելու մասին, հետևաբար եթե ասում ենք, որ դիմակ պետք է կրեն միայն նրանք, ովքեր վարակված են, արդեն իսկ նշանակում էր, որ բոլորը պետք է կրեն։ Այդ հայտարարությունները լսվել են շատ վաղուց, բայց դիմակ կրելու և մնացած պաշտպանիչ միջոցներ ձեռնարկելու մասին պարետատան հայտարարությունները հնչել են ուշացած։ Ուզում եմ հասկանալ բացի ֆեյսբուքյան ստատուսներից, այլ բանով, որ կառավարությունն ավելի լուրջ զբաղվեր, լիներ բացարձակ այլ արդյունք»,-ասաց պատգամավորը։

Աղբյուր` Փաստինֆո