Փաստ ինֆո

ԱԺ «Բարգավաճ Հայաստան» խմբակցության պատգամավոր Գևորգ Պետրոսյանը չի կարծում, որ արտակարգ դրության պայմաններում ոստիկանապետը կամ ԱԱԾ տնօրենն են մեղավոր ստեղծված իրավիճակի համար։ «Փաստինֆո»-ի հետ զրույցում պատգամավորն ասաց, որ վարչապետն ավելի շուտ պետք է փոխեր ՀՀ առողջապահության նախարարին, իսկ թե ինչով կամ ինչու ոստիկանապետն ու ԱԱԾ տնօրենը չեն արժանացել վարչապետի վստահությանը, Գևորգ Պետրոսյանը չի կարող ասել։

Ինչ վերաբերում է արտակարգ դրության պայմաններում երեք կարևորագույն ուժային կառույցներում իրականացված կադրային փոփոխություններին, ապա պատգամավորը նկատեց՝ օրենքով արգելված չէ արտակարգ դրության պայմաններում ուժային կառույցների ղեկավարներին աշխատանքից ազատելը. «Վարչապետն է նրանց անմիջական ղեկավարը, ինքն է տիրապետում իրենց փոխհարաբերություններին։ Իմ կարծիքով հատկապես ԱԱԾ տնօրենը որևէ հակաօրինական, պարսավելի կամ դատապարտելի վարքով աչքի չի ընկել, որ պաշտոնանկության հարց լիներ, բայց մանրամասներին չեմ տիրապետում, իրենց խնդիրն է»,-ասաց Գևորգ Պետրոսյանը։

Դիտարկմանը, որ լուրեր են շրջանառվում այն մասին, որ նրանց ինչ-որ ցուցումներ են տրվել, որոնք հրաժարվել են կատարել, պատգամավորն ասաց՝ ոչ կարող է հերքել և ոչ էլ բացառել, տեղյակ չէ։ Համենայնդեպս, եթե իսկապես եղել են նման ցուցումներ, որոնց կատարումը ՀՀ շահերից չի բխել և ոստիկանապետն ու ԱԱԾ տնօրենը հրաժարվել են դրանք կատարել, Գևորգ Պետրոսյանն ասաց՝ ծափահարում է նրանց. «Բայց չեմ կարող ասել, թե որքանով է դա իրական։ Մեր պետական պաշտոնյաներն ի վերջո պետք է կարողանան հասնել այն մակարդակի, որ ի վիճակի լինեն հակազդել հակապետական ցուցումների կատարմանը»,-նշեց պատգամավորը։

Անդրադառնալով երեք կառույցների նոր նշանակումներին, Գևորգ Պետրոսյանն ասաց, որ ԱԱԾ նորանշանակ տնօրենն իր նախկին ուսանողն է եղել, բայց առանձնապես չի հիշում։ Չի կարող ո՛չ բացասական, ո՛չ դրական կերպով բնութագրել։

Հարցին՝ 29-ամյա երիտասարդը կարո՞ղ է նման կարևոր կառույցը տնօրինելու փորձառություն ունենալ, Գևորգ Պետրոսյանը հիշեցրեց, որ ժամանակին պայքարում էին, որ այդ օրենքը չընդունվի. «Ես նույնիսկ ասում էի, որ 35 տարեկանն է վաղ տարիք այդպիսի պատասխանատու դիրք զբաղեցնելու համար։ Պատկերացնու՞մ եք մի ամբողջ երկրի, որի գործերը լավ չեն արտաքին աշխարհում, այդպիսի երկրի ԱԱԾ-ն գլխավորի 25, 26 կամ թեկուզ 30 տարեկան մարդ։ Համենայնդեպս չեմ ուզում ի սկզբանե կասկածի տակ դնել։ Տա Աստված, որ այդ նշանակումը բխի Հայաստանի Հանրապետության շահերից»,-ամփոփեց Գևորգ Պետրոսյանը։

Հիշեցնենք, որ այսօր պաշտոնից ազատվել են ԱԱԾ տնօրեն Էդուարդ Մարտիրոսյանը, ՀՀ ոստիկանապետ Արման Սարգսյանը, ՀՀ ԶՈՒ ԳՇ պետ Արտակ Դավթյանը։ Վարչապետի առաջարկությամբ ԶՈՒ Գլխավոր շտաբի պետի պաշտոնում նշանակվել է Օնիկ Գասպարյանը, ԱԱԾ տնօրենի պաշտոնում՝ Արգիշտի Քյարամյանը, իսկ ոստիկանապետի պաշտոնում՝ Վահե Ղազարյանը։

Աղբյուր` Փաստինֆո