Փաստ ինֆո

ԲՀԿ  ղեկավար Գագիկ Ծառուկյանը երեկ կուսակցության  խորհրդի նիստում փաստեց նոր իրադրության մասին՝ հայտարարելով, որ երկրում ստեղծված իրավիճակը պարտադրել է  հանդես գալ սթափ գնահատականներով և ներկայացնել ելքեր ժողովրդի առջև ծառացած խնդիրների լուծման վերաբերյալ:

Ծառուկյանն անդրադառնալով տարբեր ոլորտներում կառավարության վարած քաղաքականությանը և արձանագրելով ձախողում՝  տնտեսության բոլոր ճյուղերում, համախմբման կոչով դիմեց Հայաստանի, Սփյուռքի, Արցախի բոլոր կարող և առողջ ուժերին՝ նշելով, որ պատրաստ է անձամբ հանդիպել բոլոր առողջ քաղաքական ուժերի ներկայացուցիչների, երկրի ապագայով մտահոգ մտավորականների, գործիչների հետ՝ քննարկելու երկիրն այս իրավիճակից դուրս բերելու իրատեսական ծրագրերը:

Ինչպես ասում են՝ վիճակը նետված է: Երեկվա օրը բաժանարար էր: Այն բաժանարար գիծ քաշեց քաղաքական ուժերի միջև՝ տարբերակելով երկիրն ու  պետությունը կործանումից փրկելու համար միավորվող ուժերին և անհատներին՝ հանուն իշխանության և իշխանությանն ամեն գնով, այդ թվում՝ ազգի դեմ սպեցնազ հանելու գնով կառչած ուժերից:

Այս համատեքստում արդեն իսկ ներկա փուլում հանդիպումներ են տեղի ունեցել ԲՀԿ-ի և ՀՅԴ-ի ներկայացուցիչների միջև, ԲՀԿ առաջնորդի մտահոգությունները երկրորդել է  «Հայրենիք» նորաստեղծ կուսակցության ղեկավար Արթուր Վանեցյանը: Միաժամանակ, թե՝ արտախորհրդարանական ՀՅԴ-ն, թե՛ «Հայրենիք» կուսակցության ղեկավարը կոչով դիմել են  ԲՀԿ-ին և ԼՀԿ-ին` ստեղծել ԱԺ քննիչ հանձնաժողով, քննել վարչապետի ու կառավարության պատասխանատուների գործողություններն ու անգործությունը, տալ քաղաքական գնահատական:

Հանրային և մտավորական շրջանակներում նույնպես երկրի ճակատագրով մտահոգ ուժերի համախմբում է տեղի ունենում, մասնավորաբար, օրերս «Արարում» քաղաքացիական նախաձեռնությունը ազդարարեց իր մեկնարկը,  շեշտելով, որ այսօր լրջորեն վտանգված են երկրի ներքին և արտաքին քաղաքականությունը, տնտեսությունը, բնակչության սոցիալական վիճակը,  իրավական  պետության հիմքերը, ազգային մշակույթը,  հայ ընտանիքի բարոյական սկզբունքները, կրթությունը, գիտությունը, անգամ՝ երկրի  միջազգային հեղինակությունը:

Միով բանիվ,  «Արարումը»  վստահ է, որ առկա է հայության կարող ներուժ և կառուցողական լուծումներ՝ գոյություն ունեցող և օրեցօր ավելացող խնդիրներին և հիմնահարցերին:

Նշածս ուժերի համախմբումն ու բանաձևումներն իրենց տոնայնությամբ ի հեճուկս հնչեցին ՀՀ առաջին նախագահի բանաձևմանը, թե՝  «Ով պայքարում է իշխանության դեմ, կամա թե ակամա դավաճանում է ազգին»։

Միտք, որն  ըստ էության, գրեթե  չի  տարբերվում  ՀՀՇ ժամանակների՝ «ով մեզ հետ չէ, մեր դեմ է» մտայնությունից՝ հիշեցնելով դասագրքային ճշմարտություններ,  այն,  որ պետությունը և  իշխանությունը նույնական չեն, որ  Տեր-Պետրոսյանը և ՀՀՇ-ական իշխանությունը ժամանակին Հայաստան պետության դեմ էին գործում, որի պատճառով իր  հրաժարականը պահանջվեց:

Ընդդիմադիր ճակատում տեղի ունեցող համախմբման  գործընթացները փաստելով  և ի ցույց դնելով համաճարակային այս իրավիճակում  երկրի վտանգված, ականապատված բոլոր դաշտերը, լուրջ հայտ և պատրաստակամություն են ներկայացնում՝   ի շահ պետության և պետականության  կոնկրետ գործողություններ սկսելու համատեքստում:
 
Հեղինակ` Ա.Ե.

Աղբյուր` Փաստինֆո