Փաստ ինֆո

Պարետատունը հայտարարում է, որ բջջային հեռախոսների միջոցով քաղաքացիների անձնական տվյալների հավաքագրման և մշակման ծրագրի մասին տեղեկությունները հրապարակման ենթակա չեն, քանի որ այն մշակվել է կամավոր հիմունքներով։ Մարդու իրավունքների տեսանկյունից սա վտանգավոր է։

ԱԺ մարդու իրավունքների պաշտպանության և հանրային հարցերի մշտական հանձնաժողովի նախագահ Նաիրա Զոհրաբյանը «Փաստինֆո»-ի հետ զրույցում մտահոգություն հայտնեց՝ այսօր մեզանից ոչ մեկի անձնական տվյալները պաշտպանված չեն։ Պատգամավորը նկատեց՝ տեղորոշման մասին վիճահարույց, խնդրահարույց օրենքն ԱԺ բերեցին, հիմնավորման մեջ էլ վստահ համոզմունք հայտնեցին, որ համակարգը հնարավորություն կտա արագ տեղորոշել վարակվածին և նրա կոնտակտավորներին, ինչի արդյունքում կկարողանանք էականորեն նվազեցնել կորոնավիրուսի շղթան։

Այնինչ պատգամավորը նշում է՝ այսօր ունենք աշխարհում կորոնավիրուսի վարակման ու տարածման ամենաաղետալի թվերից մեկը. «Այս համակարգը ոչ միայն խնդրահարույց, այլև վտանգավոր եմ համարում։ Եկեք չմոռանանք, որ ընդամենը օրեր առաջ կորոնավիրուսով մահացածների ամբողջ տվյալները հայտնվեցին սոցիալական ցանցում։ Պատահական չէ, որ արդեն քննարկում ենք նախաձեռնություն՝ ստեղծելու հանձնաժողով՝ հասկանալու համար, թե ովքեր են մշակում մեր տվյալները և ինչ երաշխիքներ ունենք։

Կամ այդ ինչ կամավորներ են, որ պետք է մշակեն իմ անձնական տվյալները, իմ հեռախոսային կոնտակտները և ինչ երաշխիք կարող եմ ունենալ, որ վաղը դա սոցիալական ցանցում կամ X կազմակերպության, գերատեսչության ձեռքում։ Սա շատ խնդրահարույց է, առավել ևս այսօր արդեն վստահ կարող ենք ասել, որ կորոնավիրուսի կանխարգելման առումով այս համակարգը որևէ զրոյական ազդեցություն անգամ չունեցավ և երբ կառավարության ներկայացուցչին հարցնում ենք՝ քանի մարդ կարողացաք տեղորոշել այս համակարգով, ինչ-որ անհասկանալի թվեր են բերում, անհասկանալի ձևակերպումներ են ասում»,-ասաց Նաիրա Զոհրաբյանը։

Վերջինս զերծ մնաց մեղադրանքներ հնչեցնելուց, բայց ընդգծեց՝ մեղավորները պատժվելու են. «Հանկարծ մեկը չմտածի, որ այս բարձիթողի վիճակի համար պլստալու է և պատասխանատվություն չի կրելու։ Որևէ մեկը հանկարծ նախկինների նման չմտածի, որ իրենք հավերժ են և իրենց պատասխան տալու ժամանակը չի գալու, ինչպես նախկիններն էին մտածում, որ իրենք հավերժ են և դեռ 20 տարի բոլոր ճանապարհներն անցնելու են Մելիք Ադամյանով։ Ցավոք, այս իշխանության մեջ էլ կան մարդիկ, որոնք նույն մենթալիտետն ունեն, ինչպես նախկինները և մտածում են, որ իրենց ամեն ինչ կարելի է»,-ասաց Նաիրա Զոհրաբյանը։

Նա նկատեց՝ իշխանությունները հավանաբար իրենց պատճառներն ունեին այդ համակարգը ներդնելու համար. «Մեծագույն կասկածներ ունեմ, որ այդ համակարգի իրական դրդապատճառը կորոնավիրուսով վարակվածների կոնտակտները գտնելն էր։ Արդեն բոլոր հիմքերն ունեմ կասկածելու, որ համակարգի իրական պատճառներն այլ են և դրա համար մարդիկ պատասխանատվության են ենթարկվելու»,-ասաց Նաիրա Զոհրաբյանը։

Աղբյուր` Փաստինֆո