Փաստ ինֆո

2020 թվականն առնվազն պատմական է կորոնավիրուսի համաճարակի բերումով և պարզ է, որ այս տարի տնտեսական որոշակի խնդիրներ ունենալու ենք, բայց խորհուրդ կտայի չշտապել հետևություններ անել, թե ինչպիսին կլինի 2020 թվականը։ Այս մասին ԱԺ մշտական հանձնաժողովների համատեղ նիստի ժամանակ իր ելույթում ասաց ՀՀ վարչապետ Նիկոլ Փաշինյանը։ Նշենք, որ հանձնաժողովների համատեղ նիստում 2019 թվականի պետբյուջեի կատարողականի նախնական քննարկումն է, որին հեռավար տարբերակով միացել է նաև ՀՀ վարչապետ Նիկոլ Փաշինյանը։

Վարչապետը նշեց, որ կորոնավիրուսի այս ժամանակաշրջանը նոր է սկսվել և դեռ անհայտ է, թե ինչքան այն կտևի, հետևաբար կորուստները և արդյունքներն ամփոփելու համար վաղ է։ Նիկոլ Փաշինյանն արձանագրեց, ինչքան էլ 2019 թվականի բյուջեի առումով պատմական է, այնուամենայնիվ 2019թ.-ին չեն հավաքագրել այն ամբողջ պոտենցիալը, որն իրականում գոյություն ունի. «Ամենատարբեր հաշվարկներով Հայաստանում հսկայական ստվերային տնտեսություն գոյություն ունի և որոշ գնահատականներ կան, որ բյուջեի հավաքագրման պոտենցիալը կարող էր ավել լինել մինչև օրինակ 400 միլիարդ դրամի։ Վարչարարությունը շատ կարևոր է, բայց ուզում եմ ընդգծել մեր գաղափարախոսությունը։ Իմ անձնական ընկալումը, որ կարգապահությունը ոչ թե պետք է լինի ուժային գործադրման կամ հարկադրանքի արդյունք, բայց հոգեբանական և փիլիսոփայական առումով պետական ժողովրդի համար կարգապահությունը, այդ թվում բյուջետային կարգապահությունը պետք է լինի քաղաքացու պետություն ունենալու կամքի արտահայտություն»,-ասաց Նիկոլ Փաշինյանը։

Աղբյուր` Փաստինֆո