Փաստ ինֆո

Օրեր առաջ, երբ վարչապետ Փաշինյանն իր հերթական լայվերից մեկում խոսում էր դիմակներ չկրելու, ընդհանրապես, պարետատան կանոնները խախտելու մասին, մեկ էլ թվացյալ անսպասելի հիշեց ոստիկանությանը, արդեն իսկ բարձրաձայնելով ուժ կիրառելու իր որոշում-ցանկության մասին, թե՝ « պիտի սպեցնազը հանեմ եւ ծեծուջարդ անեմ ժողովրդի մեջ, որ կարգուկանոն պահպանե՞մ: Ես ո՞նց անեմ տենց բան: Ես սովոր չեմ, ես հաղորդակցության այլ կուլտուրայով եմ եկել»:

«Այլ» կուլտուրան էլ, ըստ ամենայնի՝ իր լայվերն ու ֆոտոներն են, որ արդեն մի քանի օր է որպես վարչապետական գործունեություն է իրականացնում՝ բազմակի անգամ խախտելով Մարդու իրավունքների Եվրոպական կոնվենցիայի 8-րդ հոդվածը, անձնական տվյալների պաշտպանության մասին ՀՀ օրենքի մի շարք հոդվածներ: Այսինքն, վարչապետը մեկուսացել է տանը և տնից հեռակառավարում է: Կառավարում ասածը այս ու այն ՖԲ օգտատիրոջ էջից կամ անձնական նամակով ստացված լուսանկարներն իր էջում տեղադրելն է: ՈՒ սեփական քոմենթներով դրանք հանրությանը ներկայացնելը: Մարդու իրավունքների խախտումներով, ապատեղեկատվությամբ, մեդիագրագիտության իսպառ բացակայությամբ: Բայց դա սկիզբն էր միայն, իսկ այսօր արդեն ոստիկանությունը վարչապետի հրահանգով անցավ «կորոնավիրուսի դեմ պայքարում» իր նոր գործունեության իրականացմանը, այն է՝ ծեծուջարդին:

Առավոտից սոցցանցերում տարածվող տեսանյութը շատերին կեղծ էր թվացել, մարդիկ չէին կարողանում հավատալ ու հասկանալ, թե՝ հեղափոխության օրերի ,,մեր ոստիկանները,, ինչպե՞ս կարող էին ասֆալտին պառկեցնել քաղաքացուն և աքացիներով, կոկորդից բռնած մի քանի հոգով հարձակվել դիմակ չունեցող մարդու վրա և ֆիզիկական ուժ կիրառել, իբր թե՝ նրան բերման են ենթարկում, քանի որ պարետատան կանոններն է խախտել՝ դրսում առանց դիմակի է ման գալիս: Մինչ մարդը ցավից ճչում է, թե՝ գալիս եմ, թողեք, սրանք իրենց՝ բռնարարի, մարդուն ստորացնելու անհագ ծարավն են հագեցնում կարծես՝ բոլոր կողմերից հարվածներ տեղալով անօգնական մարդուն:

Մարդկանց տարակարծությունները անձամբ վարչապետ Փաշինյանը փարատեց՝ իր խոսնակի բերանով հայտարարելով՝ «Ոստիկանությունը ուժային կառույց է, եւ սահմանված կանոնների նկատմամբ բացահայտ արհամարհանք ցույց տվողների նկատմամբ, օրենքով սահմանված կարգով կարող է եւ պե՛տք է ուժ կիրառի»:

Փաշինյանը, փաստորեն, այսպես թավիշը փոխարինում է սպեցնազական ծեծուջարդով՝ ազդարարելով գունավոր հեղափոխության նոր՝ ռեպրեսիվ փուլը, որի ժամանակ, ըստ վարչապետի՝ ոստիկանությունն իրավունք ունի գործել կտրուկ և չոր։ Եվ հավելում՝ «Խուսափելու համար նման սցենարից, կոչ ենք անում ենթարկվել հակահամաճարակային կանոններին և ոստիկանների պահանջներին»։

Եվ սա ասում է ժողովրդական վարչապետը արդեն ոչ թե ընդդիմությանը, այս կամ այն ընդդիմադիր գործչին, նախկիններին ասֆալտին փռելու, պատերին ծեփելու, բերման ենթարկելու համատեքստում, այլ ասում է սեփական ժողովրդին: Այն ժողովրդին, որը երկու տարի առաջ նրան բերեց իշխանության: Հիմա՝ Ժողովրդի վարչապետը ժողովրդին փռում է ասֆալտին՝ թքած ունենալով մարդու իրավունքների վրա, խախտելով ՀՀ Սահմանադրությունը և միջազգային կոնվենցիաները:

Սա արդեն բոլորովին նոր իրադրություն է: Արտակարգ իրադրություն: Կորոնավիրուսը առիթ է սոսկ...

Արտակարգ դրության պայմաններում մենք ականատեսն ու վկան ենք մի արտակարգ իրադրության, մի վիճակի, որն այլ բառով, քան դավաճանությունն է, դժվար է բնորոշել: Դավաճանություն ոչ բռնի հեղափոխության և ժողովրդի հանդեպ:

Կորոնավիրուսը առիթ է սոսկ, որն օգտագործում է տանը մեկուսացած և օրեցօր վարկանիշային նոր անկումներ արձանագրող Նիկոլ Փաշինյանը:

Իսկ պատճառները ավելի խորն են:

Հեղինակ Աննա Աթանեսյան

Աղբյուր` Փաստինֆո