Փաստ ինֆո

Հրապարակվել են նկարներ, որոնք խախտում են մարդու անձնական կյանքի իրավունքը, տվյալները։ ԱԺ ճեպազրույցի ժամանակ ասաց «Լուսավոր Հայաստան» խմբակցության ղեկավար Էդմոն Մարուքյանը՝ անդրադառնալով ՀՀ վարչապետ Նիկոլ Փաշինյանի հրապարակած լուսանկարներին։ 

«Չի կարելի նման բաներ անել։ Ցանկացած ժողովրդավարական զարգացած երկրում դրա արդյունքում շատ խորը ճգնաժամ կարող էր առաջանալ և շատ մեծ պրոբլեմներ կարող էր ունենալ իշխանությունը։ Հայաստանում դրա արդյունքում որևէ բան չի լինելու։ Հիմա հեռացրել է այդ նկարը, բայց օգտատերերը սկսել են տարածել սքրինշոթերը ու այդ աղջկա նկարը նորից տարածվում է։ Այ ժողովուրդ ջան, լավ ինքը սխալը հասկացել, հեռացրել է, գոնե դուք մի տարածեք»,-ասաց Էդմոն Մարուքյանը։

Դիտարկմանը՝ արդյոք նկարը հեռացնելով հարցը կլուծվի, Էդմոն Մարուքյանն ասաց, որ եթե որևէ մեկի անձնական կյանքի մասին իրավունքը խախտվել է, նա ունի քաղաքացիական դատավարության կարգով դատարան դիմելու իրավունք. «Քրեական օրենսգրքում էլ կա հոդված, այն է՝ անձի մասին տեղեկություններ հավաքելը, պահելը և տարածելը։ Դրա տակ էլ կարող է ընկնել, բայց չեմ կարող քրեաիրավական գնահատական տալ։ Չգիտեմ՝ ով է հավաքել, ով է պահել։ Տարածողին գիտեմ, շարունակությունը չգիտեմ։ Այսինքն՝ եթե այդ աղջկա ընտանիքն ուզենա, իրավական ճանապարհով կարող է հայց ներկայացնել դատարան։ Հիմա եթե դա լիներ Դանիայում, աղջկա ընտանիքը հայց կներկայացներ։ Հայաստանում միգուցե դրան չհասնենք, բայց նման իրավիճակներում մենք էլ ունենք իրավական գործիքները»,-ասաց պատգամավորը։

Խմբակցության քարտուղար Գևորգ Գորգիսյանն էլ հավելեց՝ եղել է դեպք, երբ քաղաքացին փորձել է նկարել մեկ այլ քաղաքացու և նրան ծեծել են. «Եթե այսպես շարունակվի, և կառավարությունը քայլեր չձեռնարկի օր օրի ավելի շատ գեներացվող այս քարոզի դեմ, ինչ-որ մի օր այս ամեն ինչը պայթելու է»,-ասաց Գևորգ Գորգիսյանը։

Աղբյուր` Փաստինֆո