Փաստ ինֆո

Ապրիլյան պատերազմի քննիչ հանձնաժողովի ամբողջ աշխատանքներն ընթացան կառուցողական, բայց վերջում կարծես թե մեր գործընկերները փոխեցին իրենց որոշումը և մոտեցումը։ Այս մասին ԱԺ ճեպազրույցի ժամանակ ասաց «Լուսավոր Հայաստան» խմբակցության քարտուղար Գևորգ Գորգիսյանը։

«Հայտնի պատճառներով երկու նիստ բաց ենք թողել, իհարկե հետո բոլոր տեսագրություններին, ձայնագրություններին, նյութերին ծանոթացել ենք, բայց չգիտես ինչու պարոն Անդրանիկ Քոչարյանը, երբ միայնակ կամ «Իմ քայլը» խմբակցության այլ պատգամավորների հետ փորձում էր ամփոփել աշխատանքները՝ առանց դրանց ներգրավելու ընդդիմադության որևէ ներկայացուցչի, նշեց, որ մենք այլևս հետաքրքրված չենք՝ մասնակցելու աշխատանքով, ինչի համար էլ մեզ չեն ներգրավել աշխատանքներում։ Նշեմ, որ դա բացահայտ սուտ է։ Հայտնի իրադարձություններից հետո, երբ վերադարձանք մեր բնականոն աշխատանքներին, մասնակցել ենք նիստի, որի ընթացքում նաև քննարկել ենք առաջիկայում Բակո Սահակյանի հետ ունենալ զրույց։ Այդ զրույցի պլանավորման և իրականացման պրոցեսը տեղի է ունեցել առանց մեր գիտակցության, առանց մեր ներգրավման, և սա միանշանակ կառուցողական, գործընկերային մոտեցում չէ։ Սա այն մենիշխանությունն է, որի մասին մենք խոսում ենք և որին փաստացի բոլոր ոլորտներում ձգտում են մեր գործընկերները»,-ասաց Գևորգ Գորգիսյանը։

Վերջինս նկատեց՝ միայն լրագրողների զանգերից հետո Անդրանիկ Քոչարյանը տեղեկացնում է այն հարցաշարը, որը քննարկվել է Բակո Սահակյանի հետ. «Սա առաջին դեպքն է երևի, որ հարցաշարի կազմմանը, մինչև քննարկմանը նախօրոք պատրաստմանը ընդդիմությունը չի մասնակցել»,-ասաց Գևորգ Գորգիսյանը՝ ընդգծելով, որ թեև ընթացքը եղել էր կառուցողական, բայց ունի մտահոգություններ, որ փորձվում է ընդդիմության ձայնը լռեցնել զեկույցը կազմելիս։

Աղբյուր` Փաստինֆո