Փաստ ինֆո

Երևանի ընդհանուր իրավասության դատարանում՝ դատավոր Դանիել Մխեյանի նախագահությամբ, այսօր կայացել է «Բնապահպաններն ընդդեմ փոխվարչապետ Տիգրան Ավինյանի» գործով դատական նիստը։

Հիշեցնենք, որ 15 բնապահպան հայց են ներկայացրել ընդդեմ Տիգրան Ավինյանի՝ զրպարտության համար և պահանջում են հերքել զրպարտություն հանդիսացող տվյալները։ Զրպարտության հիմք է դարձել 2019թ հոկտեմբերի 22-ին Թբիլիսիում հայ համայնքի հետ կայացած հանդիպման ժամանակ Տիգրան Ավինյանի հայտարարությունը, թե Ամուլսարի դեմ ծավալված արշավը միանշանակ չէ։ Նա հայտարարել էր, որ կան անկեղծ և ազնիվ մարդիկ, որոնք իրապես հավատում են, որ այս ծրագիրն աղետ է, բայց կան մարդիկ, որոնք ուղղակիորեն կապված են ՀՀ տարածքում հանքարդյունաբերական ոլորտի գործարարների հետ, որոնք բավական լուրջ ֆինանսական միջոցներ էին ներդնում, որ այս արշավը կազմակերպվի։

«Թե չէ, վստահեցնում եմ ձեզ, դուք Ամուլսարի մասին չէիք լսելու, որովհետեւ նման հնչեղություն հաղորդելու համար լուրջ ֆինանսական միջոցներ են պետք եւ լուրջ արշավ է պետք կազմակերպել, որը ինտենսիվորեն դեռեւս 2016-2017 թվականից արվում է»,- ասել էր Ավինյանը։

Դատարանն ապացուցման բեռ է դրել հայցվոր կողմի վրա՝ պահանջելով ապացուցել, որ Ավինյանի հայտարարությունն իրենց է վերաբերում, միևնույն ժամանակ մերժել է Ավինյանին որպես վկա հրավիրելու մասին միջնորդությունը։

Այս դատական նիստին հարցաքննվել է հայցվոր Անի Խաչատրյանը, ով ցուցմունքում նշել է, որ այս ընթացքում բազմաթիվ ճնշումների են ենթարկվել Լիդիան ընկերության կողմից։ Նրա խոսքով՝ անձամբ ինքը ենթարկվել է հարձակումների՝ ֆեյքերի միջոցով և իրենց վարկաբեկելու համար կեղտոտ տեղեկատվություն է ներկայացվել նույնիսկ իր երեխայի լուսանկարով։

«Այս ամբողջ ընթացքում ամեն մի ինֆորմացիա օգգտագործվել է մեր դեմ և այս դեպքում նաև փոխվարչապետի արած հայտարարությունը «Լիդիանը» իր բոլոր հարթակներով տարածել է շատ ակտիվ՝ նշելով մեր անունները»,- ասաց Խաչատրյանը՝ նշելով, որ իրենք անհատապես թիրախավորվել են և իրենց հաճախ ընկալում են որպես երևացող դեմքեր և երբ հայտարարություն է արվում, որ Ամուլսարի պայքարը ֆինանսավորվում է, մարդիկ միանգամից մտածում են իրենց մասին։

Անի Խաչատրյանի խոսքով՝ վերացական, օդի մեջ արված հայտարարությունները մանիպուլյացիա են։ Ավինյանի ներկայացուցչի հարցին, թե Ավինյանի հայտարարության որ հատվածն է համարվում զրպարտություն, հայցվորն ասաց, որ խոսքը գնում է այն մասին, որ պայքարը ֆինանսավորվում է հանքարդյունաբերական ընկերության կողմից։

Մանրամասները՝ տեսանյութում

Հեղինակ՝ Իզաբել Սահակյան

Աղբյուր` Փաստինֆո