Փաստ ինֆո

Ծխախոտի մաքսանենգության սկանդալային բացահայտումների առնչությամբ քրեական գործ չի հարուցվի։ Ոստիկանության ԶԼՄ-ների հետ կապի, վերլուծության և լրատվության բաժնի պետ Էդգար Ջանոյանը «Փաստինֆո»-ի հետ զրույցում ասաց, որ հրապարակումների հիման վրա նախապատրաստված նյութերով քրեական գործի հարուցումը մերժվել է՝ ՀՀ քրեական դատավարության օրենսգրքի 35-րդ հոդվածի 1-ին մասի 1-ին կետի՝ հանցագործության դեպքի բացակայության հիմքով։

Ավելի վաղ տեղեկացրել ենք, որ ՌԴ իրավապահները Երևանից 40 տոննա մաքսանենգ ծխախոտ տեղափոխող ինքնաթիռ են կալանավորել: Այս լուրից հետո մամուլում և սոցիալական ցանցերում տեղեկություններ հայտնվեցին, որ սույն մաքսանենգության հետևում կանգնած է Նիկոլ Փաշինյանի կնոջ եղբայրը՝ իմքայլական պատգամավոր Հրաչ Հակոբյանը։

Ծխախոտի մաքսանենգության դեպքերի անդրադարձել է նաեւ Վատիկանում ՀՀ նախկին դեսպան Միքայել Մինասյանը՝ նշված դեպքից բացի բարձրաձայնելով եւս երկու դեպքի մասին. Մի խմբաքանակը տնտեսական ապրանքների անվան տակ տեղափոխվել է Ռուսաստան ու հայտնաբերվել Վորոնեժում, իսկ մյուսը փորձ է արվել տեղափոխել Աբխազիա։

Դեռեւս մայիսի 4-ին հայտնի դարձավ, որ մաքսանենգ ծխախոտի վերաբերյալ հրապարակումները դատախազությունն ուղարկել է Քրեական ոստիկանություն՝ քրեադատավարական կարգով նյութեր նախապատրաստելու և ընթացքը լուծելու նպատակով։

«Ինձ համար ակնհայտ է, որ սա մաքսանենգություն է»,- «Փաստինֆո»-ին ասել էր «Թրանսփարենսի ինտերնեշնլ» հակակոռուպցիոն կենտրոնի ծրագրերի ղեկավար Վարուժան Հոկտանյանը՝ անդրադառնալով Հայաստանից դեպի Ռուսաստան տեղափոխված ծխախոտի խոշոր մաքսանենգության դեպքերին՝ ընդգծելով, որ օբյեկտիվ քննությամբ իրավապահները պետք է պարզեն, թե ովքեր են կանգնած այդ մաքսանենգության հետեւում:

Մինչդեռ, պարզվում է իրավապահները որոշել են քրգործ չհարուցել ու քննություն չտանել՝ պարզելու, թե ինչպես է կազմակերպվել ծխախոտի մաքսանենգությունը։

Աղբյուր` Փաստինֆո