Փաստ ինֆո

Հասարակությունը մի ամբողջություն, ստրուկտուրա է և այդ ստրուկտուրան քանդվում, ճեղք է տալիս։ «Փաստինֆո»-ի հետ զրույցում այս մասին ասաց հոգեբան Կարինե Նալչաջյանը՝ անդրադառնալով վարչապետի հայտարարած հանրային վերահսկողության երևույթին։

Հոգեբանի դիտարկմամբ՝ իջեցվում է նաև հասարակության շփման, խոսքի կուլտուրան. «Վերևներից լսում ես այնպիսի արտահայտություններ, որ ցնցվում ես։ Ցանկացած բան, եթե կրկնվում է, սովորական է դառնում։ Մարդն ադապտացվում է և մտածում, որ երևի այդպես կարելի է։ Սովորական քաղաքացին անկախ իրենից սկսում է կրկնօրինակել։ Այսպիսի ներքին հոգետրամադրություն է աշխատում. Եթե պաշտոնյաները կարող են այդպես խոսել, ես ինչու չեմ կարող։ Այնուհետև տեսնում ենք արդյունքը։ Սոցցանցերում կարծեք հայհոյախոսության մրցույթ լինի, մեկը մյուսին վիրավորում են։ Աչքի առաջ իջեցրեցին մարդկանց շփման կուլտուրան»,-ասաց հոգեբանը։

Վերջինս նկատեց՝ նմանատիպ երևույթ կրկին եղել է այն ժամանակ, երբ կոչ էին արել քաղաքացիներին տեսանկարահանել երթևեկության կանոնների խախտման դեպքերը և ուղարկել համապատասխան մարմիններին։ Հոգեբանի գնահատմամբ՝ սա մարդկանց իրարից բաժանելու, իրար դեմ հանելու, իրարից վրեժխնդիր լինելու ազդակներ են. «Հենց այս փաստն էլ ցույց է տալիս, թե Փաշինյանին ինչ նկարներ են ուղարկում։ Մեկ էլ ինչ-որ վաղեմություն ունեցող լուսանկարներ են ուղարկում։ Այսինքն, եթե ինչ-որ մեկին չեմ սիրում, ուզում եմ վատություն անել, մի հատ նկար եմ ուղարկում, որ խայտառակ լինեն ու թիրախավորվեն։ Մատնիչների հանրույթ են ձևավորում»,-ասաց Կարինե Նալչաջյանը՝ հավելելով, որ երկիրն այնպիսի վիճակում է, որ ղեկավարը գիշեր-ցերեկ պետք է կենտրոնացած զբաղվեր խնդիրները լուծելու ուղղությամբ։ Փոխարենը, ըստ հոգեբանի, խնդիրներն աչքի առջև ավելանում են, իսկ պատասխանատվությունից հրաժարվելը, ցուցադրական գործողություններն ու ժողովրդին «փչացնելը» շարունակվում է։

«Մարդիկ իրար նկատմամբ կասկածամիտ են դառնում։ Մեկը տեսնում է կողքինն ինչ-որ բան է նկարում, մտածում է՝ կարող է իրեն է նկարում։ Թշնամանքի, կասկածամտության, անվստահության մի մթնոլորտ է, որը բերում է հոգեբանական տարանջատման։ Այսպես` բոլորն իրար պոտենցիալ մատնիչներ կարող են թվալ»,-ասաց Կարինե Նալչաջյանը։

Նա չբացառեց, որ արդյունքում կարող ենք լուրջ խնդիրներ ունենալ, քանի որ եթե ներսից հասարակության հոգեբանական ամբողջությունը քայքայված է, ապա դրսի ազդեցություններին, այդ թվում թշնամու կողմից եկող, դիմացկունությունն ընկնում է, ամբողջությունը խզվում է. «Որ կողմ ն այում ես, արհեստածին խնդիր է։ Իրական խնդիրները մոռացվում են, չեն լուծվում։ Աստված գիտի՝ որ պլան են մղվում և կենտրոնանում ենք այս արհեստածին խնդիրների վրա, որոնք ապակառուցողական են»,-ամփոփեց հոգեբանը։

Հիշեցնենք, որ ՀՀ վարչապետ Նիկոլ Փաշինյանը ֆեյսբուքյան իր էջում գրառում էր կատարել՝ կոչ անելով քաղաքացիներին սահմանել հանրային վերահսկողություն և հակահամաճարակային կանոնները խախտելու դեպքեր արձանագրելիս տեղյակ պահել այդ մասին։ Արդյունքում շատերը վարչապետի ֆեյսբուքյան էջին են ուղարկում լուսանկարներ, որոնք վարչապետը հրապարակում է։ Այսօր ԱԺ ճեպազրույցի ժամանակ «Լուսավոր Հայաստան» խմբակցության քարտուղարը նշեց, որ եղել է դեպք, երբ քաղաքացին փորձել է նկարել մեկ այլ քաղաքացու և նրան ծեծել են. «Եթե այսպես շարունակվի, և կառավարությունը քայլեր չձեռնարկի օր օրի ավելի շատ գեներացվող այս քարոզի դեմ, ինչ-որ մի օր այս ամենը պայթելու է»,-նշեց պատգամավորը։

Հեղինակ՝ Հասմիկ Կոշկարյան

Աղբյուր` Փաստինֆո