Փաստ ինֆո

Եթե մեղավոր է կառավարությունը, մեղավոր է նաև ժողովուրդը, որովհետև այս ժողովուրդն է այս կառավարությանը բերել իշխանության՝ օրերս հայտարարեց Նիկոլ Փաշինյանը՝ պատասխանատվությունն առերևույթ իր վրայից թոթափողի նման:

Իհարկե, այս հայտարարությունը նրան ոչ մի կերպ չի կարող փրկել, քանի որ իրեն հավատացող ժողովուրդը դեռ կառավարության ձևավորման սկզբնական փուլում էր ահազանգում Փաշինյանի վարած անհաջող կադրային քաղաքականության մասին: Ասել է, թե՝ ժողովուրդն իրեն է ընտրել, այդ ի՛նքն է կադրերին ընտրել: Ընդ որում, նա կարող էր, չէ՞ խորհրդակցելով գիտակների հետ՝ պրոֆեսիոնալների կառավարություն ձևավորել: Նրան տրված էր նաև համաձայնության կառավարություն ձևավորելու հնարավորությունը, բայց ո՛չ, Փաշինյանը գնաց բոլորովին այլ՝ սև ու սպիտակի բաժանելու, հեղափոխական-հակահեղափոխական խաղալու ճանապարհով՝ ասպարեզ բերելով մարդկանց, որոնք կառավարման համակարգում նույնիսկ կրտսեր մասնագետ չէին կարող աշխատել:

Ասենք, ու՞մ կարող է համոզել Փաշինյանը, թե՝ ժողովուրդն իր կամքով Հայկոյին ընտրեց քաղաքապետ: Ժողովուրդը Երևանի ավագանու ընտրությունների ժամանակ ասում էր՝ Նիկոլին ենք ընտրում, ինչպես և Ազգային Ժողովի ընտրությունների ժամանակ էր ասում:

Հետաքրքիր է, իսկ Նիկոլի՞ն իր ո՞ր արժանիքների համար էր ընտրում ժողովուրդը: Այսօր այդ նույն ժողովրդի շարքերից շատերը բարձրաձայնում են արդեն, թե ուղղակի նախորդներից ազատվելու համար էր արված ընտրությունը: Այսինքն, ժողովրդական զանգվածները հեղափոխության օրերին մերժում էին Սերժին: Ընդամենը: Եվ դարձյալ Նիկոլն էր, որ ժողովրդին հուշեց իրեն վարչապետ կարգելու մասին: Ինքը դրդեց ժողովրդին՝ եթե ինձ արտոնեք, եթե ինձ լիազորեք՝ այս կարգի եթե-ապաներ շատ էին հնչում հեղափոխության օրերին: Ինքն իր ցանկությունը որպես ժողովրդի ցանկություն ներկայացրեց, նախ՝ ինքն իրեն օծելով որպես ժողովրդի վարչապետ… Ամեն ինչ ժողովրդի աչքի առաջ էր…

Բայց սեփական ժողովրդին, իրեն հավատացողներին մեղադրելու հարցում Փաշինյանն այսօր զուտ հայտարարություններով չի բավարարվում: Հայտարարելով, թե՝ կորոնավարակակիր է, նա հեռավար լծվել է մարդկանց դեմ ալիբիներ հավաքելու գործին՝ ժողովրդի դեմ փաստական և ապացուցողական տվյալներ՝ լուսանկարներ, տեսանյութեր է հավաքում և հեղինակային ստատուսներով տարածում աշխարհով մեկ՝ տեսեք-տեսեք ես չեմ մեղավոր Հայաստանում համաճարակի տարածման և մեծ թվերի համար, այլ՝ ժողովուրդը, որն օրենք ու կանոն չհարգող է: Բնականաբար, այդ ընթացքում բազմիցս նաև ապատեղեկատվություն է տալիս, հետո ջնջում, բացատրում, պարզաբանում: Մի խոսքով, սեփական ժողովրդի դեմ է աշխատում: Այդ ալիբին հենց այնպես չի ապահովում:

Հեղինակ Մ.Մինասյան

Աղբյուր` Փաստինֆո