Փաստ ինֆո

Մոտավորապես երկու ամիս նույն վիճակն է։ Նույն բանկերի մոտ նույն հերթերը եղել են և որևէ մեկն այդ հարցով չի զբաղվել։ Հիմա ուղղակի այդ նկարները տեղադրել, որ իբր թե նոր եղավ, այդպես չէ։ Այս մասին լրագրողների հետ զրույցում ասաց «Լուսավոր Հայաստան» խմբակցության ղեկավար Էդմոն Մարուքյանը։

Իրավիճակը երկար ժամանակ է այդպիսին է և պատգամավորի խոսքով ժամանակի ընթացքում համապատասխան մարմիններն իրենց վրա դրված պարտավորությունները չեն արել. «Օրինակ մարզերում մարզպետարաններ, համայնքապետարաններ։ Այսինքն միայն ոստիկանությունը չի, որ պետք է այդ գործողություններն իրականացնի։ Լավ է ուշ, քան երբեք, գոնե այսօրվանից սկսած այդ հեռավորությունը պահպանվի։ Քիչ առաջ խոսել եմ Կենտրոնական բանկի նախագահի հետ և քննարկել ենք այդ հարցը։ Նա ասաց, որ ակտիվ զբաղվում են։ Գիտեմ, որ կան բանկեր, որտեղ անձնակազմը կես-կես են աշխատել, օրինակ երեք մարդ նստած է, մյուս երեքին չեն կանչել գործի, որ եթե մարդ վարակվի, առողջ մարդ ունենան»,-ասաց Էդմոն Մարուքյանը։

Անդրադառնալով ավելի խիստ սահմանափակումների անհրաժեշտությանը՝ Էդմոն Մարուքյանն ընդգծեց՝ ավելի խիստ սահմանափակումներ կարող են կիրառվել, եթե մարդկանց տրամադրեն ապրելու համապատասխան միջոցներ. «Օրինակ նրանց փոխարեն վճարվեն կոմունալները, փող տան, որ մարդիկ ապրեն։ Չի կարող տոտալ կարանտին լինի, բայց մարդկանց փող չտան, որ ապրեն։ Հետևաբար կառավարությունը ծանր խնդրի առջև է կանգնած, որովհետև չի կարող փակել, որևէ բանով չաջակցի։ Եթե փակի, պետք է աջակցի, իսկ դրա համար պետք է միջոցներ ունենա։ Կարծում եմ՝ բանալին եղած սահմանափակումները ճիշտ կիրառելու մեջ է, որ ճիշտ ժամանակին համապատասխան սահմանափակումների քանակ լինի»,-ասաց պատգամավորը։

Վերջինս հավելեց՝ հիմա մեղավորներ փնտրելու ժամանակը չէ։ Ժամանակը կգա ԱԺ-ում քննիչ հանձնաժողով կստեղծեն և բոլոր մեղավորներին կկանչեն, կխոսեն այդ ամենի մասին։ Էդմոն Մարուքյանը նկատեց, որ հիմա մեղքը ժողովրդի վրա բարդելու ժամանակն էլ չի։

Աղբյուր` Փաստինֆո