Փաստ ինֆո

Մեր հիմնական նպատակն այն է, որ հրաժարական տա կորոնավիրուսը և այդ հրաժարականին հասնենք միասին։ Այս մասին այսօր ճեպազրույցի ժամանակ ասաց ՀՀ վարչապետ Նիկոլ Փաշինյանը՝ պատասխանելով հարցին՝ կորոնավիրուսի դեմ պայքարը ձախողելու հետ կապված հնարավոր են հրաժարականներ։

«Ինչ վերաբերում է մեղադրանքներին, սխալ է, որ հիմնական մեղադրանք է հնչում քաղաքացիների հասցեին։ Ոչ մի մեղադրանք չի հնչում։ Իրավիճակի գնահատական է հնչում։ Պետք է ախտորոշենք մեր իրավիճակը, ախտորոշենք, թե ինչն այնպես չենք արել և ինչն այնպես չենք անում, որ այս ամեն ինչը տեղի է ունենում։ Մեղադրանք հնչում է այն ժամանակ, երբ լինում է տուժող կողմ և վնասը պատճառած կողմ։ Այստեղ չկան այդ կողմերը։ Մենք բոլորս միասին և՛ տուժողն ենք, և՛ վնասը պատճառողն ենք, հետևաբար այս ամենի լուծումը մեկն է. հանրային վերահսկողությամբ մենք բոլորս պետք է դառնան մեր իսկ վարքագծի վերահսկողը»,-ասաց Նիկոլ Փաշինյանը։

Վարչապետը նշեց, որ երեկ շատ ավելի մեծ քննադատությամբ էր վերաբերվում ոստիկանության աշխատանքին, քան այսօր. «Երեկվանից այսօր տեսա հակահամաճարակային կանոնների չպահպանման մասշտաբը, սարսափեցի, որովհետև իրականում այդ մասշտաբն առաջին հայացքից երևացող տեղերում, շատ դեպքերում պահպանվում է, բայց որտեղ աչքից հեռու է, չի պահպանվում։ Մեր խնդիրն է ոչ թե լինել հակոտնյա ոստիկանություն-հանրություն, այլ լինել միասին»,-ասաց վարչապետը։

Նա նկատեց՝ եթե վարակվել է կորոնավիրուսով, նշանակում է ինքն էլ չի պահպանել հակահամաճարակային կանոնները։ Վարչապետն առաջարկում է ընդունել, որ բոլորս էլ սխալվել ենք և միասին պայքարել վարակի դեմ։

Աղբյուր` Փաստինֆո