Փաստ ինֆո

Պարետատան նիստից հետո ՀՀ պարետ, փոխվարչապետ Տիգրան Ավինյանը ներկայացրեց այսօր պարետատան կողմից կայացրած նոր որոշումները. «Այսօրվա պարետատան նիստին մի քանի կարևոր հարցեր են քննարկվել, մասնավորապես դիմակների կրման վերաբերյալ հարցը։ Նախնական որոշումը, որ ընդունվել էր դիմակների պարտադիր կրում սահմանվել էր փակ տարածքներում՝ տրանսպորտային միջոցներում, կանգառներում, ինչպես նաև առևտրի կետերում և սպասարկման տարբեր սրահներում։

Պարտադիր պահանջ էր նաև դիմակների առկայությունը մարդկանց մոտ, որոնք գտնվում են փողոցներում և բաց հասարակական տարածքներում։ Այս որոշումը ուներ մեկ հիմնական նպատակ, որպեսզի անցումը լիներ փուլային։ Արդեն իսկ սահմանվելու է, որ բնակության վայրի բնակելի տարածքից դուրս գտնվելիս, բոլոր հանրային բաց տարածքներում դիմակ կրելը դառնալու է պարտադիր, բացառությամբ՝ մինչև վեց տարեկան երեխաների համար և ֆիզիկական վարժություն կամ հեծանվավարժություն իրականացնելիս, ինչպես նաև սահմանվում են համապատասխանաբար դիմակ կրելու կանոնները։

Նման ունիվերսալ և առանց ծայրահեղ բացառությունների սահմանումը նաև վերահսկողության հարցի հեշտացման համար է և որոշ դեպքեր ուղղակի թողնված են բանական և տրամաբանված մոտեցմանը։

Հասկանում եմ, որ դիմակի կրումն իր հետ շատ անհարմարություններ է բերելու, մանավանդ այս եղանակային պայմաններում, բայց, ցավոք, այս փուլում կանոնների առումով բավականին նեղ շրջանակ է մնացել է և այդ նեղ շրջանակից ընտրվել են ամենաէֆեկտիվները, մասնավորապես՝ դիմակի կրումը էականորեն նվազեցնում է կորոնովարակի տարածման ինտենսիվությունը և սա ապուցուցված է տարբեր գիտական հոդվածներով, իսկ եռաշերտ դիմակների կրումն էլ ավելի մեծ էֆեկտի է բերում։

Քննարկվել են նաև այլ հարցեր, մասնավորապես՝ գնահատվել է առողջապահական համակարգի ներկա վիճակն ու սպասարկման հնարավոր ծավալները։ Մեր գործիքակազմում մենք ունենք ծայրահեղ միջոցներ, ինչպես նաև տեղաշարժի սահմանափակման վերադարձը, տնտեսական գործունեության տեսակների սահմանափակումներին վերադարձը, ինչպես նաև՝ հնարավոր պարետային ժամի սահմանման հնարավորությունը ։ Դեռևս այս փուլում, ելնելով ներկա իրավիճակից և ներկա առողջապահական համակարգի ծանր, բայց որոշ չափով կայուն իրավիճակից, որոշել ենք չկիրառել այդ տարբերակները և գնալ կանոնների պահպանման տրամաբանությամբ»։

Աղբյուր` Փաստինֆո