Փաստ ինֆո

Վարչապետ Նիկոլ Փաշինյանի կորոնավիրուսով վարակվածության փաստը հակասական ընկալումների տեղիք է տվել։ Մամուլում և համացանցում տարատեսակ վարկածներ են հնչում այն մասին, թե արդյո՞ք վարչապետը կարո՞ղ էր վարակվել պարզապես վարակակրի կողմից իրեն փոխանցված բաժակին դիպչելով կամ արդյո՞ք վարակված աշխատակիցը կառավարության այլ անդամների չի վարակել ևս։ Հնչեց նաև տեսակետ այն մասին, որ երկրի առաջին դեմքի և իր ընտանիքի անդամների վարակվածության փաստն ազգային անվտանգության տարրեր է պարունակում իր մեջ։

Այս և այլ հարցերի պարզաբանումներ ստանալու նպատակով, «Փաստինֆո»-ն զրուցել է վարչապետի մամուլի խոսնակ Մանե Գևորգյանի հետ։

- Արդյո՞ք կորոնավիրուսակիր մեկուսացվածների և ինքնամեկուսացվածների անվտանգության կանոնների մեջ փոփոխություններ կատարվել են։

- Ոչ։ Միայն մեկուսացվածների մասով այն է փոխվել, որ այն վիրուսակիրները, որոնք ասիմպտոմ են տանում վիրուսը, ոչ թե հիվանդանոցային բուժում են ստանում, այլ տանն են ստանում իրենց բուժումը, այլ կերպ ասած, պետք է տանն անցկացնեն բուժման համար նախատեսված ժամկետը՝ բժիշկների հսկողության ներքո։

- Իսկ արդյո՞ք վարչապետն իրավունք ուներ, թեկուզ ընդունված պաշտպանիչ միջոցներով՝ դիմակով ու ձեռնոցներով շփման դուրս գար այլ անձանց հետ։

- Այո, որովհետև նրա մոտ հիվանդությունն ասիմպտոմ է անցնում։ Նա կարող է շփվել՝ պահպանելով համաճարակաբանական անվտանգության կանոնները։

- Պարոն Փաշինյանն իր հայտնի լայվում հայտարարել էր, որ, հավանաբար, վարակվել է խորհրդակցությունների ընթացքում՝ վիրուսակրի առանց ձեռնոցների մատուցված բաժակին դիպչելով։ Բացի վարչապետից ուրիշ ովքե՞ր են մասնակցել այդ խորհրդակցություններին, որին ներկա է եղել հիվանդ աշխատակիցը։

- Ոչ ոք չի մասնակցել։ Վարչապետը մենակ է եղել, ինքն է օգտվել միայն։ Վարակակիրը նույնպես մեկուսացված է։

- Հասկանալի է, այսինքն՝ այդ խորհրդակցություններին միայն վարչապե՞տն է եղել։

- Խորհրդակցություն չի եղել ։

- Այսինքն ի՞նչ է եղել, ինչպես հասկանանք։

- Այսինքն, վարչապետն օգտվել է այդ բաժակից, որն իրեն մատուցել է այն անձնավորությունը, որը արդեն իսկ վարակված է եղել։

- Շատ լավ...բայց դա խորհրդակցության ընթացքում չի՞ եղել, ինքը մենա՞կ է եղել։

- Ճիշտն ասած, ես չեմ հիշում։ Վարչապետը կարծեմ դրա վերաբերյալ պարզաբանում տվել է իր ուղիղ եթերում, ճի՞շտ է։

- Իհարկե, դրա համար եմ ես Ձեզ հիմա հարցնում։

- Դե դրա համար, խնդրում եմ, վարչապետի ուղիղ եթերը մի հատ նայեք։

- Եվ վերջին հարցը, տիկին Գևորգյան, քանի՞ բաժակ է այնտեղ եղել, այսինքն՝ քանի՞ բաժակի է դիպչել վիրուսակիրը նշված դեպքում։

- Մեկ բաժակ և դա եղել է վարչապետի բաժակը։

Նշենք, որ կորոնավիրուս վարակվելու մասին Նիկոլ Փաշինյանը հայտարարել էր հունիսի 1-ին՝ ֆեյսբուքյան ուղիղ եթերում։ «Կռահում եմ, թե որտեղ և ինչպես եմ վարակվել։ Վարակվել եմ աշխատանքային խորհրդակցությունների ընթացքում։ Մի դեպք եմ արձանագրել և համոզմունք կա, որ այդ դեպքի հետ է կապված։ Խոհրդակցության ժամանակ ջրի բաժակներ են դնում, մի օր ֆիքսեցի բաժակն առանց ձեռնոցի տեղադրելու փաստի հետ, իհարկե նկատողություն արեցի ու առաջարկեցի, որ փոխեն, բայց ենթադրում եմ՝ դրանից առաջ էլ նույն կերպ է եղել։ Այն մարդը, ով մատուցում էր բաժակը, նրա մոտ էլ է կորոնավիրուս հաստատվել»,- հայտարարել էր վարչապետը։

Վարչապետի մամուլի խոսնակի մեկնաբանություններից հետևում է, որ վարչապետի անցկացրած խորհրդակցությանը միայն Փաշինյանն է մասնակցել ու վարակակիրը հենց միայն Փաշինյանին է սպասարկել... համաձայնեք, որ իսկապես բազում հարցեր են առաջանում։

Աղբյուր` Փաստինֆո