Փաստ ինֆո

«Մենք գործ ունենք գլոբալ խնդրի հետ, ճիշտ նկատեցիք, որ երկու տարի առաջ ժողովուրդը պանծացնում էր իշխանություններին, իշխանություններն էլ գովասանքի խոսքեր էին հղում ժողովրդի հասցեին եւ փոխադարձ ջերմեռանդություն էր, բայց երկու տարի հետո արդեն հակառակն է՝ ժողովուրդը իշխանություններին է վատաբանում ամենավերջին բառերով, իշխանությունն էլ՝ թե առաջին դեմքը, թե թիմը, ոչ այնքան հաճելի որոշ արտահայտություններ են անում, օրինակ ֆեոդալական մտածողություն ունեն եւ այլն»,-«Փասստինֆո»-ի հետ զրույցում ասաց քաղաքագետ Արծրուն Պեպանյանը՝ անդրադառնալով դիտարկմանը, որ կորոնավիրուսով պայմանավորված ճգնաժամի մեղքը կառավարությունն, ի դեմս վարչապետի, փորձում է բարդել ժողովրդի վրա՝ շարունակ նշելով, թե հակահամաճարակային կանոնները լավ չեն պահպանվում, այն դեպքում, երբ այդ նույն ժողովուրդն է Փաշինյանին իշխանության բերել եւ փաստորեն, մինչեւ երկրում խնդիրների ի հայտ գալը, վարչապետի ընկալմամբ, ժողովուրդը բարձր քաղաքացիական գիտակցություն ուներ ու իր քայլն արել էր:

Արծրուն Պեպանյանի խոսքով, սա լուրջ խնդիր է եւ առաջին անգամը չէ, որ դրսեւորվում է: «Այդ երեւույթը ես նկատել էի դեռ 1997 թվականին, որ սկզբից ժողովուրդն է սկսում տրտնջալ իշխանություններից, որ խաբեցին, խոստումները չեն կատարում, հատկապես, որ 1991-ին մի անասելի ոգեւորություն կար Արցախյան շարժման հետ կապված»,-ասաց քաղաքագետը, հավելելով, որ ինքն անձամբ եղել է իշխանության մեջ՝ 1993-97 թվականներին եւ իրականությանը նայել է նաեւ իշխանության աչքերով:

«Ես նկատել եմ, թե ինչպես իշխանությունները, նույն Տեր-Պետրոսյանի ժամանակ, աստիճանաբար սկսում են իրենք էլ իրենց հերթին հիասթափվել ժողովրդին: Ես ներկա եմ եղել, երբ հավաքվել են նախագահով, վարչապետով, պետության համար կարեւոր խնդիր են փորձել լուծել, որոշում են կայացրել, այդ որոշումը գնացել է կառավարությունից նախարարություն, հետո մարզպետարան, հետո իջնում է քաղաքներ , գյուղեր, հազար մարդ է մտնում որոշման կատարման ընթացքի մեջ ու աղավաղվում է: Ամեն մի կառույց իր խեղաթյուրման աստիճանի չափ խեղաթյուրում է եւ որոշումը, որը պետք է դրական արդյունք տար, չի տալիս»:

Ըստ Պեպանյանի, իշխանավորներն այս երեւույթը տեսնելով, սկսում են հիասթափվել ժողովրդից եւ նույնը տեղի է ունեցել նաեւ Ռոբերտ Քոչարյանի, Սերժ Սարգսյանի ժամանակ, բայց վերջիններս այդ մասին բացահայտ չէին խոսում:

«Հիշո՞ւմ եք Արսինե Խանջյանը 2018թ ապրիլին բացահայտեց իր եւ Սերժ Սարգսյանի առանձնազրույցից մի դրվագ, որի ժամանակ Սերժ Սարգսյանը շատ վատ էր արտահայտվել հայ ժողովրդի մասին: Դա ապացույց էր այն բանի, որ Սերժ Սարգսյանն ինքն էլ էր հիասթափված ժողովրդից: Հիմա եկել են նորերը, պարզ է, որ իրենք էլ հույսեր են տվել ժողովրդին եւ կուզենային լավ բան անել եւ իրենք գտնում են, որ հիմնական անհաջողությունները ժողովրդից է գալիս ու սկսում են հիասթափվել, իսկ երբ սկսում են ժողովրդից հիասթափվել, կարող է մի պահ գա, որ ասեն՝ ձեզ չի հասնում: Մենք 4 իշխանություն ենք ունեցել եւ բոլորն էլ եկել են այն մտքին, որ այս ժողովրդին չի հասնում այն չարչարանքը, որն իրենք թափում են պետությունը կառավարելու համար, իսկ երբ հասնում է դրան, իր համար մեկ է՝ կհիվանդանաս, թե ոչ»,-բացատրում է Արծրուն Պեպանյանը:

Ըստ քաղաքագետի խոսքը իշխանական ֆրուստրացիայի մասին է եւ մինչեւ կորոնավիրուսի փուլը արդեն իսկ նկատելի էր , որ նոր իշխանությունն սկսում էր չսիրել ժողովրդին:

Նրա դիտարկմամբ՝ մասնավորապես կորոնավիրուսով պայմանավորված իրավիճակում սկզբնական փուլում իշխանությունն անուշադիր էր ու լավ չէր պատկերացնում իրավիճակը, բայց հետո համապատասխան կոչերով հանդես եկավ, մինչդեռ ժողովուրդը համարժեք պահվածք չդրսեւորեց:

«Դուք ինքներդ,երբ անընդհատ ասեիք՝ դիմակ կրեք, դիմակ կրեք ու տեսնեիք, որ չեն կրում, չէի՞ք ասի, ձեր հերն էլ անիծած: Հիմա, նախկին իշխանությունները բարձրաձայն սա չէին ասում, այս նորերը , որ անփորձ են, իսկ առաջին դեմքն էլ իմպուլսիվ է, կարող է ասել, հետո զգա, որ սխալ արեց, ասում են այն, ինչ գալիս է իրենց ուղեղին: Մենք այս խնդիրը ունենք, հաջորդ իշխանությունն էլ գա, այս կրկնակի ֆրուստրացիան շարունակվելու է, մինչեւ մենք չհասկանանք սրա արմատները»,կարծում է Արծրուն Պեպանյանը:

Դիտարկմանը, որ ժողովուրդը մոլորության մեջ է հայտնվել հենց իշխանությունների անհեռատես հայտարարությունների պատճառով, Արծրուն Պեպանյանն արձագանքեց. «Այո, այդ անփորձությունն էլ կա, դա էլ է գալիս գումարվում, բայց եթե անգամ կորոնավիրուսը չլիներ, էլի փոխադարձաբար հիասթափվելու ընթացքը պետք է գար եւ էլի նույնն է լինելու: Արդեն 4-րդ անգամ մեր իշխանությունն ու ժողովուրդը թշնամանում են: Այսօր ժողովուրդը երկու մասի է բաժանվել՝ նիկոլապաշտներ եւ հականիկոլականներ, այսինքն, էլի գնում ենք նույն արահետով, մինչդեռ պետք է ի վերջո խորքային պատճառները հասկանալ, թե ինչո՞ւ արդեն 4-րդ անգամ մենք նույն պրոբլեմն ենք ունենում»:

Աղբյուր` Փաստինֆո