Փաստ ինֆո

Չեմ վիճում, որ կան անբարեխիղճ փաստաբաններ, որ կան չարաշահումներ, բայց խնդրում եմ, երբ խոսում ենք որևէ խավի մասին, բառամթերքում այդ շեշտադրումն արեք, որ անբարեխիղճ փաստաբանների մասին է խոսքը գնում։ Այս մասին Ազգային ժողովում «Բանկային ավանդների ներգրավման մասին օրենքում» փոփոխություններ և լրացումներ կատարելու մասին օրինագծի քննարկման ժամանակ ասաց «Իմ քայլը» խմբակցության պատգամավոր Սուրեն Գրիգորյանը։

«Երբ առհասարակ ասում եք փաստաբանները, փաստաբանները, առանց էդ էլ այսօր շատ օբյեկտիվ ու սուբյեկտիվ պատճառներով որոշակի վերաբերմունք կա փաստաբանների վերաբերյալ, և չեմ ուզում, որ որևիցե պետական պաշտոնյա խրախուսի այդ ոչ ճիշտ պատկերացումները փաստաբանների նկատմամբ։ Եթե խոսքը գնում է առանձին փաստաբանների անբարեխղճության մասին, Դուք մեկը կասեք, ես տասը կասեմ, բայց առհասարակ որպես մասնագիտություն, ասել խոսքեր, որոնք կարող են մարդկանց մոտ պատկերացում ձևավորել՝ փաստաբան= անբարեխղճություն, նման արտահայտություններից զերծ մնացեք»,-ասաց պատգամավորը։

Նշենք, որ «Իմ քայլը» խմբակցության պատգամավոր Արտակ Մանուկյանը նախագիծը ներկայացնելիս ասաց, որ ուսումնասիրել են մի շարք տվյալներ և ակնհայտ է, որ երբեմն հատկապես փաստաբանական համայնքը չարաշահում է այս հաղորդակցության մեթոդի ընտրությունը և կարող են դեպքեր լինեն, երբ մեկ ավանդատուն տարվա ընթացքում հինգ և ավելի անգամ անընդհատ փոխում է հաղորդակցության մեթոդը, որում պատգամավորը տեսնում է նաև փաստաբանի գործոնը։ Հավելենք, որ նախագծով նախատեսվում է ֆինանսական կազմակերպությունների բոլոր հարաբերություններում ներդնել էլեկտրոնային եղանակը։

Աղբյուր` Փաստինֆո