Փաստ ինֆո

Վանաձորի «Գլորիա» կարի ֆաբրիկայի 3 աշխատակցի մոտ կորոնավիրուս է հաստատվել։ Այս մասին «Փաստինֆո»-ի հետ զրույցում ասաց կարի ֆաբրիկայի տնօրեն Բագրատ Դարբինյանը։

«Ամեն օր ջերմաչափում ենք իրականացնում, ով սիմպտոմ է ունենում չենք թողնում աշխատանքի, տուն ենք ուղարկում։ Մարզպետն առավոտյան զանգահարեց, ասաց, որ 3 հոգու մոտ հաստատվել է։Այսօր եկել էին համաճարակաբանական կենտրոնից հաստատված դեպքերի հետ անմիջական անմիջական շփում ունեցողներին թեստավորեցին։ Մոտ 50-60 մարդու թեստավորեցին։ Թե նրանցից քանիսը վարակված կլինեն, քանիսը՝ ոչ, չգիտեմ»,-ասաց Բագրատ Դարբինյանը։

«Գլորիա»-ի տնօրենը նշում է, որ վարակվածները կանայք են, նրանցից միայն մեկն է 60-ից բարձր, բայց երեքի վիճակն էլ այս պահին նորմալ է։ «Խիղճս այնքանով է հանգիստ, որ բոլոր պայմանները և նույնիսկ ավելի խստացված ձևով իրականացնում ենք։ Ախտահանիչ միջոցներ, սպիրտային լուծույթներ, քլորային հեղուկներ, ջերմաչափում, դիմակներ։ Ամեն ինչ պահպանում ենք, բայց որ վարակվել են ի՞նչ անենք»,-ասաց Բագրատ Դարբինյանը։

Նրան հայտնի չէ, թե որտեղից են վարակվել աշխատակիցները։ Նշում է՝ մեկ ամիս տանն են եղել և ոչ ոք չգիտի՝ ով որտեղ է եղել, ում հետ է շփվել. «Էն ժամանակ էլ էի ասում, որ ավելի լավ էր աշխատեին։ Հոգնած գնում էին տուն, ժամանակ էլ չէին ունենում ուրիշի հետ շփվել»,-հավելեց Բագրատ Դարբինյանը։

Հեղինակ՝ Հասմիկ Կոշկարյան

Աղբյուր` Փաստինֆո