Փաստ ինֆո

Խորհրդարանում քննարկվում է ԱԺ պատգամավորներ Նիկոլայ Բաղդասարյանի և Սոնա Ղազարյանի կողմից ներկայացված «ՀՀ քրեական դատավարության օրենսգրքում» լրացումներ և փոփոխություններ կատարելու մասին օրենքի նախագիծը երկրորդ ընթերցմամբ և ամբողջությամբ ընդունելու մասին հարցը։

Նիկոլայ Բաղդասարյանը նշեց, որ նախագծով առաջարկվում է կարգավորել անչափահաս տուժողների և վկաների հարցաքննության ընթացակարգը. «Առաջարկում ենք, որ հարցաքննությունները պարտադիր կարգով ձայնագրվեն, ինչպես նաև հարցաքննություններին մասնակցեն նաև որակավորված հոգեբան»,-ասաց պատգամավորը։

Նախագծի համահեղինակ Սոնա Ղազարյանը նկատեց՝ այս նախագիծն անչափահասների հարցաքննության կարգավորման մասին է. «Մենք բացառում ենք երեխաների կրկնակի հարցաքննությունը՝ ապահովելով ամբողջ հարցաքննության տեսաձայնագրությունը։ Ինչպես նաև ողջ հարցաքննության ընթացքում ապահովելու ենք հոգեբանների ներկայությունը, ինչը թույլ կտա երեխաների համար ավելի մեղմ պայմաններ ստեղծել»,-ասաց պատգամավորը։

Վերջինս հավելեց, որ Նիկոլայ Բաղդասարյանի հետ այցելել են ոստիկանությունում հատուկ կահավորված սենյակ, որը նախատեսված է անչափահասների հարցաքննության համար։ Պատգամավորի խոսքով այն գույնզգույն է, հատուկ սարքավորումներ ունի, որով հնարավոր է ձայնագրել հարցաքննության ողջ ընթացքը։

Աղբյուր` Փաստինֆո