Փաստ ինֆո

Ռոբերտ Քոչարյանի գործով դատական նիստերը պարբերաբար հետաձգվում են՝ պաշտպանների միջնորդությունների պատճառով, ինչը պատճառ է դառնում դատաքննությունը չսկսելու համար։ Այս մասին ասել է ԱԺ «Իմ քայլը» խմբակցության պատգամավոր Անդրանիկ Քոչարյանը՝ հետաքրքրվելով ՀՀ գլխավոր դատախազ Արթուր Դավթյանից, թե ինչ քայլեր է ձեռնարկում դատախազությունը ողջամիտ ժամկետները պահպանելու համար։

Պատասխանելով հարցին՝ Դավթյանն ասաց, որ մոտ մեկ տարի է, ինչ քրեական գործը դատարանի վարույթում է և գրեթե ամեն կայացված դատական նիստին խափանման միջոցի փոփոխման մասին միջնորդություն է ներկայացվում պաշտպանների կողմից։

«Մենք ունենք վարույթ ընդունած դատարանի որոշում, որտեղ հստակ ասվում է, որ քննության ներկա փուլում առկա են ռիսկեր՝ ամբաստանյալի պատշաճ վարքագծի, հետևաբար կալանքը կիրառելի է »,- ասաց Դավթյանը՝ հավելելով, որ քանի դեռ դատաքննության փուլի անցում չի կատարվել, այդ ռիսկերի նվազման մասին խոսք գնալ չի կարող։

Դավթյանը նշեց, որ օրեր առաջ դատարանը հերթական դատական ակտում այդպես էլ ամրագրվել է, որ ժամանակը հոսել է, բայց դատավարական առումով փուլ չի փոխվել և ապացույցներ չեն հետազոտվել, այդ ռիսկերն առկա են։

«Պաշտպանության կողմի նմանատիպ վարքագիծն ակնհայտորեն պաշտպանական իրավունքի չարաշահման վկայությունն է»,- ասաց Դավթյանը՝ նշելով, որ դատարանն ունի բոլոր հիմքերն ապացույցների հետազոտման փուլին անցնելու համար։

Մանրամասները՝ տեսանյութում։

Աղբյուր` Փաստինֆո