Փաստ ինֆո

«Օրենքով գող» համարվող Արսեն Մկրտչյանին (մականունը՝ Արսեն Երեւանսկի) քրեակատարողական հիմնարկում բժիշկներ են այցելել։ Այս մասին «Փաստինֆո»-ն տեղեկացավ Մկրտչյանի պաշտպան Վարդուհի Էլբակյանից։

Նրա փոխանցմամբ՝ Մկրտչյանին այսօր այցելել են անոթային վիրաբույժը, սրտաբանը և օրթոպեդը։ Ըստ բժիշկների ուսումնասիրության եզրակացության՝ Մկրտչյանն այս պահին ունի բազմապրոֆիլ կլինիկայում ստացիոնար բուժման և հետազոտման կարիք, ընդ որում՝ կյանքի ցուցումով։

Փաստաբանը նշեց, որ բժիշկների գնահատմամբ՝ Արսեն Մկրտչյանի վիճակը ծայրահեղ ծանր է, ունի հենաշարժողական խնդիրներ, շարժվում է ձեռնափայտի և կողմնակի անձանց օգնությամբ։ Բացի այդ՝ փաստաբանը նշեց, որ Մկրտչյանն ունի նաև բաց վերքեր, որոնք կարիք ունեն մասնագետի կողմից ամենօրյա մշակման և վիրակապման կարիք։

Պաշտպան Լուսինե Մարտիրոսյանն էլ «Փաստինֆո»-ի հետ զրույցում հիշեցրեց, որ նախկինում Մկրտչյանն արդեն ազատվել էր պատասխանատվությունից՝ առողջական խնդիրների պատճառով և տեղեկացրեց , որ այս պահին էլ վարույթն իրականացնող մարմնի ձեռքի տակ եղել է փաստաթուղթ, որտեղ սևը սպիտակի վրա գրված է՝ ազատվում է պատժի կրումից մահացու հիվանդության պատճառով։

«Արսեն Մկրտչյանի մոտ առկա հիվանդություններից երեքը հստակ մտնում են Կառավարության որոշմամբ սահմանված պատժի կրման հետ անհամապատասխանելիության ցանկում»,- ասաց Մարտիրոսյանը։

Անդրադառնալով Արսեն Մկրտչյանի նկատմամբ ընտրված խափանման միջոց կալանավորմանը՝ Լուսինե Մարտիրոսյանը տեղեկացրեց, որ բողոքարկել են այն։ Ըստ նրա՝ կալանավորման մասին դատարանի որոշումը պատճառաբանված և հիմնավորված չէ։ Նշենք, որ Մկրտչյանին մեղադրանք է առաջադրվել ՀՀ քրեական օրենսգրքի 223.2-րդ հոդվածի 2-րդ մասի 5-րդ մասով՝ քրեական աստիճանակարգության բարձրագույն կարգավիճակ ունեցող անձի կողմից քրեական ենթամշակույթ կրող խմբավորում ստեղծելու և ղեկավարելու հատկանիշներով, սակայն մեղադրանքը նա չի ընդունել։

Հիշեցնենք՝ մայիսի 22-ին ԱԱԾ-ն հայտարարեց, որ քրեական աստիճանակարգության բարձրագույն կարգավիճակ ունեցող անձի կողմից, քրեական ենթամշակույթ կրող խմբավորում ստեղծելու և ղեկավարելու հիմնավոր կասկածանքով 2020թ. մայիսի 21-ին ՀՀ ԱԱԾ քննչական դեպարտամենտ է բերման ենթարկվել «Արսեն Երևանսկի» մականունով Արսեն Մկրտչյանը և քրեական աստիճանակարգության բարձրագույն կարգավիճակ ունեցող անձի կողմից քրեական ենթամշակույթ կրող խմբավորմանը մասնակցելու կամ դրա հետապնդած նպատակների իրականացմանը ներգրավված լինելու կամ քրեական ենթամշակույթ կրող խմբավորման հավաքներ կազմակերպելու կամ դրանց մասնակցելու կասկածանքով՝ «Բասար» մականունով Արմեն Մելքոնյանը:

Բացի այդ, քրեական ենթամշակույթ կրող խմբավորման մասնակցին կամ քրեական աստիճանակարգության բարձրագույն կարգավիճակ ունեցող անձին դիմելու կասկածանքով բերման են ենթարկվել 8 անձ։

Հեղինակ՝ Իզաբել Սահակյան

Աղբյուր` Փաստինֆո