Փաստ ինֆո

Բոլոր օրենքները պետք է ծառայեն ՀՀ քաղաքացիներին, այս պարագայում պետք է ծառայեն նաև ՀՀ քաղաքացու անվտանգությանը։ Այս մասին այսօր լրագրողների հետ զրույցում ասաց ԱԺ «Իմ քայլը» խմբակցության ղեկավար Լիլիթ Մակունցը՝ անդրադառնալով սահմանադրական հանրաքվեն չեղարկելու վերաբերյալ օրենքին։

«Հանրաքվեի չեղարկումը համավարակի այս պայմաններում պարզապես անհրաժեշտություն է։ Կարծում էի՝ սա պետք է ընդունելի լիներ նաև ընդդիմադիր գործընկերների համար։ Կարծում եմ, որ մտահոգությունը ոչ այնքան պայմանավորված է հանրաքվեն չեղարկելու հետ կապված, որովհետև «Լուսավոր Հայաստան» խմբակցությունը դեմ էր, «Բարգավաճ Հայաստան» խմբակցությունը չի քվեարկել՝ այդկերպ արտահայտելով իր դեմ դիրքորոշումը։ Կարծում ենք, որ խնդիրը Սահմանադրական դատարանի ճգնաժամը լուծելու հետագա քայլերին է առնչվում և նրանց դիրքորոշումը պայմանավորված է հենց դրանով։ Իսկ ինչ է նշանակում լուծել ՍԴ-ի ճգնաժամը։ Դա նշանակում է, որ 2015 թվականին ընդունված Սահմանադրությունը և գործող սահմանադրական մարմինները, այդ թվում ՍԴ-ն պետք է գործի հենց այն սահմանադրությամբ, որն ընդունվել է։ Մենք չենք թաքցնում և ասել ենք այդ մասին, որ ձեռնարկելու ենք անհրաժեշտ բոլոր միջոցները, որպեսզի 2015 թվականի Սահմանադրությունը և ՍԴ մոդելը համապատասխանեն իրար»,-ասաց Լիլիթ Մակունցը։

Դիտարկմանը՝ արդյոք համավարակի օրերին այդ հարցը հյետաքրքրում է մարդկանց, Լիլիթ Մակունցն ընդգծեց, որ Սահմանադրությունը և Սահմանադրական դատարանի մոդելն իրար չեն համապատասխանում, և այդ համապատասխանությունը պետք է լինի. «Համավարակի առնչությամբ բոլոր անհրաժեշտ գործողություններն իրականացվում են։ Միևնույն ժամանակ դա չի նշանակում, որ ՀՀ-ում բարեփոխումների օրակարգը պետք է կանգ առնի։ Բարեփոխումների օրակարգը շարունակվելու է, և այդ օրակարգի մի մասն է կազմում նաև ՍԴ մոդելի համապատասխանությունը 2015թվականին ընդունված Սահմանադրությանը, ինչպես նաև դատաիրավական համակարգի բարեփոխումների նախագիծը, սոցիալական անհրաժեշտ նախագծերը»,-ասաց խմբակցության ղեկավարը։

Անդրադառնալով Վենետիկի հանձնաժողովին ուղղված հարցերին, Մակունցն ասաց, որ պատասխանները ստանալուց հետ խմբակցությունը կքննարկի, թե ինչ տարբերակով է առաջ գնում։

Աղբյուր` Փաստինֆո