Փաստ ինֆո

ՀՀ քրեական օրենսգրքի 300.1-րդ հոդվածի հետ կապված իրավական որոշակիության և հետադարձ ուժի առումով որևէ խնդիր չկա։ Այս մասին լրագրողների հետ զրույցում ասել է ՀՀ գլխավոր դատախազ Արթուր Դավթյանը։

Դավթյանի խոսքով՝ բոլոր փաստարկները և դատարանում, և հրապարակային խոսքում պայմանավորվել են գործի տվյալների հետ։

«Այսինքն՝ ինչ է նկարագրված մեղադրանքի ծավալի մեջ և այդ մեղադրանքի ծավալն այդ հոդվածի հետ կանխատեսելիության առումով համադրվում են, թե չեն համադրվում»,- ասաց Դավթյանը՝ նշելով, որ ՄԻԵԴ-ն ի պատասխան ՍԴ երրորդ հարցին ասել է, որ դա պետք է որոշվի կոնկրետ դեպքում՝ կոնկրետ քրեական գործի տվյալներից ելնելով, այն, ինչ տարիներ շարունակ ասել են։

«Ես կարծում եմ, որ ԵԴ-ի կողմից հարցման առնվազն երկու հարցին չպատասխանելով, դրանք վերացական գնահատելով, երկու հարցերին էլ տալով բոլորիս համար հանրահայտ, ակսիոմալ դիրքորոշում, ընդամենն ավելի վերահաստատեց մեր նախկին դիրքորոշումը, որ քննության այս փուլում այդ գործը ՍԴ վարույթում ընդունվելու գործ չէր և այդ առումով մենք նաև իրավական արդյունք ենք ունեցել, որ այն դիմումը, որն ընդունել է ՍԴ-ն և որի հիման վրա իրականացնում է այդ վարույթը, գիտենք, որ այդ ակտը՝ Դավիթ Գրիգորյանի կողմից կայացված, վերադաս դատարանի կողմից բեկանվել է և, ըստ էության, կարող ենք ասել, որ այսօր օրինական ուժի մեջ մտած, օրինական ուժ ունեցած ակտ չկա, որ պահանջում էր ՍԴ կողմից այդ գործով վարույթի իրականացում »,- ասաց Դավթյանը։

Լրագրողի հարցին, թե արդյո՞ք կվերաբացվի «Յոթի» գործը, Դավթյանն ասաց, որ իր գործընկերները 2009-2010 թթ ոչ մի պատճառաբանություն չգրելով, որոշում են կայացրել մեղադրանքից հրաժարվելու մասին, ինչն առնվազն հնարավորություն չի տալիս գոնե վիճլու իր գործընկերների՝ իրավական մեկնաբանության հետ։
«Այդ ակտը որևէ նախադեպային նշանակություն չի կարող ունենալ»,- ասաց Դավթյանը։

Աղբյուր` Փաստինֆո