Փաստ ինֆո

Վարչական դատարանի որոշմամբ ՀՀ երկրորդ նախագահ Ռոբերտ Քոչարյանը մինչև համավարակի ավարտը կմնա բժշկական կենտրոնում։ Արդյոք նման դիրքորոշումը նշանակում է, որ քրեակատարողական հիմնարկներում գտնվող այն քաղաքացիները, որոնք առողջական խնդիրներ ունեն կամ գտնվում են խոցելի խմբում կարող են օգտվել նման հնարավորությունից։ Այս հարցով Գլխավոր դատախազ Արթուր Դավթյանին դիմեց ԱԺ «Իմ քայլը» խմբակցության պատգամավոր Արուսյակ Ջուլհակյանը։

Արթուր Դավթյանը նշեց, որ դատական ակտը ոչ թե դատարանի կողմից կայացած վերջնական ակտն է, այլ դատարանը հայցի ապահովման միջոց է կիրառել և սահմանել, որ մինչև արտակարգ դրության ավարտը չի տեղափոխվի քրեակատարողական հիմնարկ. «Այս վարույթի կողմերը պաշտպանը քրեակատարողական ծառայությունն են։ Որպես կանոն, օրենսդրական ոչ հստակ կարգավորումների պատճառով այս բնույթի վարույթներում դատարանները մեզ չեն ծանուցում, բայց բովանդակային առումով այն է, որ դատախազն այս վարույթներում մասնակցություն պետք է ունենա, առնվազն պատիժների և հարկադրանքի օրինականության նկատմամբ հսկողության լիազորությունների արդյունավետ իրացման շրջանակներում։

Համապատասխան հայցի ապահովման միջոցը դեռևս պաշտոնապես չի առաքվել դատախազություն։ Հույս ունեմ՝ այսօր կստանանք համապատասխան դատական ակտը, կծանոթանանք դրա հիմնավորումներին և քրեակատարողական ծառայության մեր գործընկերների հետ կքննարկենք հետագա անելիքները»,-ասաց Արթուր Դավթյանը։

Գլխավոր դատախազը չբացառեց՝ դատարանի այդ որոշումը հնարավոր է բողոքարկվի։

Անդրադառնալով Ռոբերտ Քոչարյանի գործով ՍԴ հարցերի վերաբերյալ ՄԻԵԴ խորհրդատվական կարծիքին՝ գլխավոր դատախազն ասաց, որ առաջադրված չորս հարցերից երկուսին ՄԻԵԴ-ն ընդհանրապես չի պատասխանել՝ դրանք դիտարկելով որպես վերացական հարցեր. «Մյուս երկու հարցի՝ իրավական որոշակիության և հետադարձ ուժի առումով աքսիոմատիկ իրավաբանություն է ներկայացրել։ Այսինքն` բազմաթիվ այլ նախադեպերում արտացոլված իր հստակ դիրքորոշումը, թե ինչ ընդհանուր կանոնների պետք է բավարարի իրավական որոշակիությունը և հետադարձ ուժի կանոնները։

Հստակ մատնանշել է, որ, ըստ էության, կոնվենցիայի 7-րդ հոդվածի խախտում չի տեսնում։ ՄԻԵԴ-ի որոշումն ակնհայտ վկայությունն է մեր նախկինում հայտնած բազմաթիվ դիրքորոշումների, որ այդ հարցերին պետք է անդրադառնա գործը քննող դատարանը և ոչ եվրոպական և նույնիսկ Սահմանադրական դատարանը։ Երրորդ-չորրորդ հարցերի պարզաբանման մեջ եվրոպական դատարանը հստակ համադրություն է անում և ասում, որ այս հետևություններին վերացական փաստերով հնարավոր չէ գալ։ Այսինքն` գործի կոնկրետ հանգամանքների արդյունքում գործը քննող դատարանն ինքը պետք է հետևության գա՝ որոշակի է օրենքը, թե ոչ, հետադարձ ուժը կիրառելի է, թե ոչ»,-ասաց Արթուր Դավթյանը։

Աղբյուր` Փաստինֆո