Փաստ ինֆո

Մեկուսացման քաղաքականությունը վարեցինք այնքան ժամանակ, քանի դեռ մեր հյուրանոցային և մեկուսացման վայրերի հնարավորությունները ներում էին։ Այս մասին ճեպազրույցի ժամանակ ասաց ՀՀ վարչապետ Նիկոլ Փաշինյանը՝ պատասխանելով հարցին՝ արդյոք ասիմպտոմ դեպքերին դուրս գրելով վարակի տարածմանը չենք նպաստում։

«Եկավ մի պահ, որ այնքան շատ էին մեկուսացվածները և դրական դեպքերը, որ այլևս նրանց նման պայմաններում պահելու հնարավորություն չկար և ըստ էության լուծման այլ տարբերակ գոյություն չուներ։ Շատ դեպքերում չաշխտորոշված դեպքն ավելի վտանգավոր է վարակի տարածման առումով, քան ախտորոշվածը։ Ե՛վ ախտորոշվածը, և՛ շրջապատի մարդիկ գիտեն դրա մասին և կրկնակի, եռակի ավելի զգույշ են լինում, իսկ շատ ավելի վտանգավոր են չախտորոշված այն դեպքերը, որոնք իրենք էլ չգիտեն, շրջապատն էլ չգիտի, որ իրենք վարակված են»,-ասաց Նիկոլ Փաշինյանը։

Հարցին՝ իրավիճակը վերահսկողությունից դու՞րս է եկել, Նիկոլ Փաշինյանը նկատեց՝ այդ իրավիճակը վերաբերում է այն պարագային, երբ վերակենդանացման բաժանմունքի ենթակա հիվանդի համար ազատ մահճակալ չգտնվի. «Շատ լարված ենք աշխատում, բայց նաև ամենօրյա աշխատանք է տարվում տարբեր բուժհաստատությունների հետ, որպեսզի վերակենդանացման տեղերն ավելացնեն»,-ասաց վարչապետը։

ՀՀ առողջապահության նախարար Արսեն Թորոսյանն էլ հավելեց՝ վերջին օրերին արդեն ավելացումներ եղել են, մասնավորապես Արտաշատի բժշկական կենտրոնում։ Առաջիկայում սպասվում է երեք խոշոր ավելացում՝ «Աստղիկ» ԲԿ-ում. «Մոտավորապես 20 ռեանիմացիոն մահճակալ, ևս 20 ինտենսիվ թերապիայի մահճակալ։ Սբ. Գրիգոր Լուսավորիչ բժշկական կենտրոնում մոտ 50 ռեանիմացիոն մահճակալ և Էրեբունի բժշկական կենտրոնում 45-ից 50 ռեանիմացիոն մահճակալ»,-ասաց նախարարը։

Աղբյուր` Փաստինֆո