Փաստ ինֆո

Մենք սեպտեմբերին կարող ենք լիարժեք սկսել դասերը, բայց խստագույնս պետք է հետևենք ցուցումներին։ Այս մասին ֆեյսբուքյան ուղիղ եթերի ժամանակ ասաց Կրթության, գիտության, մշակույթի և սպորտի նախարար Արայիկ Հարությունյանը։

«Ինձ համար շատ տարօրինակ են դպրոցական խնջույքների մասին լուրերը, որտեղ վարակի տարածման ամենամեծ հնարավորությունը կա։ Սիրելի աշակերտներ այս մասսայական միջոցառումներով մենք նախ հեռացնում ենք բնականոն կյանքին վերադառնալու հնարավորությունը և քանի որ Հայաստանում շատ հաճախ ապրում ենք մեր ծնողների, տատիկ-պապիկների հետ, երեխաներն ամենայն հավանականությամբ հիվանդությունն ասիմպտոմ կտանեն, բայց մեծ հավանականությամբ կվտանգեն իրենց տատիկ-պապիկների և ծնողների կյանքը։ Վարակման շատ կոնկրետ օրինակ կարող եմ ասել, որը կարելի էր կանխել և այսօր այդ ընտանիքում կորուստ չէինք ունենա։ Մի երիտասարդ եկել է իր ընկերոջ տուն՝ իմանալով, որ որոշակի առողջական խնդիրներ ունի և հավանականություն կա, որ ինքը վարակված է, և այդ ընտանիքում այսօր ունենք հիվանդացածներ և մահ։ Սա մեր իրողությունն է»,-ասաց Արայիկ Հարությունյանը։

Նախարարը նշեց, որ կան որոշ ասեկոսեներ, որ նախարարությունը պատրաստվում է սեպտեմբերի 1-ից շարունակել դասերը հեռավար մեթոդով. «Էդ նույնն ա, որ հիմա ասեք՝ դե պատերազմ չկա Ադրբեջանի հետ և եկեք բանակ չպահենք կամ բանակը չպատրաստենք հնարավոր պատերազմի։ Կորոնավիրուսի այս տարածումը և արտակարգ դրությունը պատերազմ է և պատերազմական վիճակ է առանց ճակատի, և մենք պետք է պատրաստ լինենք շատ տարբեր սցենարների։ Մեզ համար շատ ցանկալի է դասերը սկսել սեպտեմբերի 1-ից, բայց նաև պետք է պատրաստ լինենք հեռավարի։ Եթե մենք եկանք օգոստոսի վերջին և պարզվեց, որ ունենք մի իրավիճակ, ապա պետք է դրան պատրաստ լինենք։ Որոշակի իրավիճակներում առնվազն տարրական դասարանները և առաջին դասարանների դասերի վերսկսումը պետք է ապահովենք, որովհետև հասկանում եմ, որ աշակերտը պետք է գնա դպրոց ու միջավայրին ծանոթանա, որ նույնիսկ, եթե ինչ-որ մի փուլում հեռավարով շարունակի, ինքը դասերն ընկալելու, սովորելու, ուսուցչին ընկալելու հմտություններն ունենա»,-ասաց նախարարը։

Աղբյուր` Փաստինֆո