Փաստ ինֆո

Անթույլատրելի եմ համարում երկիրը հակամարտող, անգամ՝ միմյանց նկատմամբ թշնամության հասնող ճամբարների բաժանելու արատավոր գործելաոճը,- «Հայրենիք» կուսակցության համագումարում հայտարարել է կուսակցության նախագահ Արթուր Վանեցյանը։

«Այսօր տեսնում եմ պետության համար լուրջ ռիսկեր, բարդ խնդիրներ, տեսնում եմ վտանգավոր սխալներ, որ ամեն օր արվում են, ինչպես կանխատեսել էի։ Ցավոք, իրականանում են իմ վատագույն կանխատեսումները։ Հիմա էլ պնդում եմ, որ անհրաժեշտ է իրականացնել մեծ աշխատանք՝ ավելի վատ զարգացումներից խուսափելու համար։ Հենց դա՛ ինձ ստիպեց զբաղվել քաղաքականությամբ։ Իրական քաղաքականությամբ»,- նշել է նա՝ հռետորական հարցադրում հնչեցնելով, թե ո՞վ ենք մենք և ուր ենք գնում։

Ա.Վանեցյանը նշել է, որ իրենք առաջարկում ենք ծրագիր և գործելաոճ, որի հիմքում են.

· Պատասխանատվությունն՝ ընդդեմ ինֆանտիլիզմի

· Ազնվությունն՝ ընդդեմ ստի և մանիպուլյացիայի

· Կարգապահությունն՝ ընդդեմ ամենաթողության

· Միասնականությունն՝ ընդդեմ պառակտման

· Համակարգն՝ ընդդեմ քաոսի

· Կայունությունն՝ ընդդեմ անորոշության

· Պրոֆեսիոնալիզմն՝ ընդդեմ դիլետանտիզմի

· Պրագմատիզմն՝ ընդդեմ պոպուլիզմի

«Անթույլատրելի եմ համարում երկիրը հակամարտող, անգամ՝ միմյանց նկատմամբ թշնամության հասնող ճամբարների բաժանելու արատավոր գործելաոճը: Գիտակցելով մեր երկրում լուրջ, համակարգային բարեփոխումների, երբեմն՝ արմատական վերափոխումների կարևորությունը և պատրաստ լինելով ստանձնել դա անելու պատասխանատվությունը, մենք միևնույն ժամանակ հեռու ենք այն ծայրահեղական մոտեցումից, թե իբր նախկինում ամեն ինչ միայն վատ է եղել, իսկ քաղաքական մեր թվարկությունը սկսվել է այն պահից, երբ ոմանք երկիրը գունաբաժանել են սեւի եւ սպիտակի»,- ընդգծել է Ա.Վանեցյանը:

Աղբյուր` Փաստինֆո