Փաստ ինֆո

«Ամենատրամաբանական պատճառն այն է, որ մաքսանենգության այս սկանդալները եւ Նիկոլ Փաշինյանի ընտանիքի անդամների ներգրավվածությունն այնտեղ համապատասխանում են իրականությանը»,-«Փաստինֆո»-ի հետ զրույցում նման կարծիք է հայտնել քաղաքագետ Աղասի Ենոքյանը՝ անդրադառնալով այն հարցին, թե ինչու չի ՀՀ վարչապետ Նիկոլ Փաշինյանը ուղիղ կերպով արձագանքում ծխախոտի մաքսանենգության վերաբերյալ մեղադրանքներին, որոնցում իր ընտանիքի անդամների անուններն են շոշափվում :

Աղասի Ենոքյանի խոսքով, լրատվություն տարածվեց, որ հիմա փորձ են անում այդ հանցագործության հետքերը Հայաստանում մաքրել,սակայն այս դեպքում, ըստ քաղաքագետի, մենք գործ ունենք միջազգային սկանդալի հետ, եւ որքան էլ մեր երկրում փորձեն կոծկել ամեն ինչ, միեւնույնն է, այն Ռուսաստանից իր արձագանքն է ունենալու։ «Թե ե՞րբ եւ ինչպե՞ս՝ սա կարծում են քաղաքական հարց է, առայժմ այդ մահակը պահվում է Նիկոլ Փաշինյանի գլխին՝ պատրաստ իջնելու ամեն պահի, երբ նա իրեն կպահի Ռուսաստանի ցանկություններին հակառակ»,-կարծում է Ենոքյանը։

Հիշեցնենք, կառավարություն–ԱԺ վերջին հարցուպատասխանի ժամանակ պատգամավոր Տիգրան Ուրիխանյանը ուղիղ հարց ուղղեց վարչապետին, վերջինս սակայն, սլաքներն ուղղեց Սուրբ Աթոռում ՀՀ նախկին դեսպան Միքայել Մինասյանի դեմ՝ հիշելով պապի ու շաղգամի հեքիաթը: Մինասյանը, ինչպես գիտենք, տեսաուղերձներով անդրադարձել էր ոչ միայն երեք խմբաքանակ ծխախոտի, այլեւ ադամանդի մաքսանենգության հետ վարչապետի ընտանիքի առնչության մասին:

Ստացվում է, որ վարչապետն ընտրել է հարձակումը լավագույն պաշտպանության միջոցն է տրամաբանությո՞ւնը: «Փաստինֆո»-ի այս հարցին քաղաքագետը պատասխանեց. «Կրկին սա խոսում է այն մասին, որ Նիկոլ Փաշինյանը իրական բացատրություններ չունի եւ դրա համար փորձ է անում լռեցնել ընդդիմախոսներին։ Ըստ էության, երբ նրան հարցնում են սկանդալների մեջ իր ընտանիքի անդամների ներգրավվածության մասին, Նիկոլ Փաշինյանն սպառնում է՝ ես ձեր ընտանիքի անդամների նկատմամբ քրեական գործեր կհարուցեմ։ Սա պարզապես շանտաժով լռեցնելու անթաքույց փորձ է։ Մեր երկրի իրականությունը ցույց է տալիս, որ հնարավոր է մարդկանց նկատմամբ քրեական հետապնդումներ սկսել հորինած առիթներով, եւ Նիկոլ Փաշինյանը հույս ունի, որ նմանակերպ գործելաոճով ինքը կհաջողի։ Անկեղծ ասած, ես չեմ տեսնում նրա համար այլ ելք, քան այսպիսի հակահարձակումներն ու շանտաժները»։

Անդրադառնալով այն հանգամանքին, որ մաքսանենգության դեպքերով քրեական գործեր չեն հարուցվում, քաղաքագետը շեշտեց, որ եթե իրականությանը համապատասխպանում են գծված մաֆիոզ սխեմաները, ապա քրեական գործեր չի կարելի հարուցել եւ ամեն ինչ ջարդել ինչ-որ «սլաքավարների»՝ ցածրաստիճան պաշտոնյաների վրա, որոնց կարելի զոհաբերել։ «Պատճառն այն է, որ այս պաշտոնյաները պարզապես կարող են բացահայտել, թե ովքեր են իրենց ստիպել պաշտոնեական կեղծիք կատարել, հանցագործության վրա աչքերը փակել, կամ էլ մասնակից դառնալ հանցագործությանը: Իրավապահներին նույնպես դիրքորոշումներ փոխանցելու խնդիր չկա, որովհետեւ ըստ նկարագրվածի, այս ամենը կատարվել է բարձր քաղաքական հովանու ներքո, իսկ իրավապահները Հայաստանում հիմա ոչ այնքան իրավունքը պահպանելու համար են, որքան քաղաքական իշխանության կամքն իրագործելու»։

Աղասի Ենոքյանի խոսքով, եթե հանկարծ ինչ-որ հրաշքով իրավապահներն անցնեն իրենց իրական գործը կատարելուն, ապա քաղաքական իշխանության վիճակը խիստ կբարդանա:

«Այնպես, որ ավելի լավ է, նրանց չխառնել այս գործին։ Այսինքն, քրեական գործեր հարուցելը լուծում չէ, եւ կարող է ավելի խորացնել առաջացած պրոբլեմները»-եզրափակեց Աղասի Ենոքյանը:

Աղբյուր` Փաստինֆո