Փաստ ինֆո

Արցախի Հանրապետության նորընտիր նախագահ Արայիկ Հարությունյանը Արցախի ԱԱԾ արդեն նախկին տնօրեն Սամվել Շահրամանյանին նշանակեց Ռազմահայրենսիրության, երիտասարդության, սպորտի և զբոսաշրջության նախարարի պաշտոնում։ Այս մասին ֆեյսբուքյան ուղիղ եթերի ժամանակ ասաց Արայիկ Հարությունյանը։

Նրա խոսքով Սամվել Շահրամանյանին շնորհվել է նաև գեներալ-մայորի կոչում։ Արայիկ Հարությունյանը վերջինիս հետ մեծ հույսեր է կապում։
Արցախի ԱԱԾ տնօրենի պաշտոնում նախագահի որոշմամբ նշանակվել է ԱՀ ոստիկանապետի նախկին տեղակալ, գներել-մայոր Կամո Աղաջանյանը.

«Նրան վաղուց եմ ճանաչում։ Մեր լավագույն լեգենդար հրամանատարներից է եղել։ Համոզված եմ, որ համատեղ աշխատանքով կարողանալու ենք զարգացնել ԱԱԾ աշխատանքը։ Կարևորում եմ նաև Հայաստանի հետ համագործակցությունը։ Նոր որակական փոփոխություն է պետք լինելու և Հայաստանի իշխանությունների հետ պայմանավորվել ենք, որ ծառայությունը բավական լուրջ համագործակցության որակ է հաղորդելու»,-ասաց ԱՀ նախագահը։

Վերջինս նկատեց՝ աշխատանքներում թերացել են Մարտունու և Քաշաթաղի վարչակազմի ղեկավարները։ Հենց այդ պասիվության պատճառով Արայիկ Հարությունյանի որոշման համաձայն՝ Ստեփան Սարգսյանն ազատվել է Քաշաթաղի շրջանի վարչակազմի ղեկավարի պաշտոնում։ Նոր ղեկավար է նշանակվել Արտյոմ Սարիբեկյանը. «Այս վարքագիծը բոլորի համար թող օրինակ լինի։ Հանձնարարականները չկատարելու առումով լինելու են նմանատիպ որոշումներ»,-ասաց Արայիկ Հարությունյանը։

Նա ընդգծեց՝ կադրերի ընտրության համար հիմնականում օգտվելու են տեղական կադրերից և նախարարներին, գերատեսչության ղեկավարներին էլ հորդորեց շրջաններում կադրեր ընտրելու ընթացքում առաջնորդվել այդ սկզբունքով։

Աղբյուր` Փաստինֆո