Փաստ ինֆո

Քաջարանցիների աղմկահարույց գործով Երևանի ընդհանուր իրավասության դատարանը՝ դատավոր Արտուշ Գաբրիելյանի նախագահությամբ, մերժել է Մարատ Ստեփանյանին կալանավորելու մասին քննիչի միջնորդությունը։ Այս մասին «Փաստինֆո»-ն տեղեկացավ պաշտպան Լուսինե Մարտիրոսյանից։

Նրա փոխանցմամբ՝ դատարանը մերժել է միջնորդությունը՝ հիմնավոր կասկածի բացակայության հիմքով։ Նշենք, որ դատական նիստին մասնակցել է նաև դատախազը։

Հիշեցնենք, որ Մարատ Ստեփանյանին մեղադրանք էր առաջադրվել ՀՀ քրեական օրենսգրքի 131-րդ հոդվածի 2-րդ մասի 1-ին կետով՝ մի խումբ անձանց կողմից նախնական համաձայնությամբ անձին առևանգելու համար, նա իրեն մեղավոր չի ճանաչել։

Ավելին, ինչպես «Փաստինֆո»-ն մայիսի 27-ին տարածել է, գործով տուժող ճանաչված անձը եւս հայտարարել է, որ իրեն տուժող չի ճանաչում ու Երեւանում տված ցուցմունքում հերքել ավելի վաղ տված իր իսկ ցուցմունքը՝ նշելով, որ դրանք տվել է ճնշումների ներքո։Այդուհանդերձ, նախաքննական մարմինը Մ.Ստեփանյանին եւ եւս երկու քաջարանցու մեղադրանք է առաջադրել մի խումբ անձանց կողմից նախնական համաձայնությամբ անձին առևանգելու համար և միջնորդություն ներկայացրել դատարան՝ նրանց նկատմամբ կալանավորումը որպես խափանման միջոց ընտրելու վերաբերյալ։

Մյուս երկու մեղադրյալների խափանման միջոցի հարցը դատարանում դեռ քննարկվում է։

Ավելի վաղ տեղեկացրել ենք, որ մայիսի 24-ին Երեւանից հատուկ ջոկատայիններ են գործուղվել Սյունիք հատուկ գործողություններ իրականացնելու նպատակով: Վաղ առավոտյան սպեցնազն անցել է գործի եւ 4 անձ բերման է ենթարկվել։ Հետագայում՝ մեկ հոգին ազատ է արձակվել. Հայտարարվեց, թե

Նրան սխալմամբ էին բերման ենթարկել ու հենց նրա նկատմամբ էլ ոստիկանության բաժնում բռնություն է գործադրվել։ Համենայն դեպս՝ երեկ մամուլում տարածվել էր բռնության հետքերով լուսանկարները։ Ոստիկանության բաժնի մոտ հավաքվել էին մեծ թվով քաջարանցիներ՝ պահանջելով ազատություն ու արդարություն։ Նրանք բողոքի ակցիան դադարեցրին միայն այն բանից հետո, երբ Քաջարանի համայնքի ղեկավարը հայտարարեց, որ իրեն հավաստիացրել են, որ ոստիկանության բաժնում կիրառված բռնության դեպքի առթիվ պատշաճ քննություն կընթանա։

Ձերբակալվածները տեղափոխվել էին Երեւան, եւս այստեղ փաստաբանները բողոք էին ներկայացրել նրանց ձերբակալելու որոշումների դեմ։ Դատարանը բոլոր երեք դեպքում էլ ձերբակալությունը համարել էր ոչ իրավաչափ ու ազատել արգելանքից՝ գտնելով, որ բացակայում է հիմնավոր կասկածը։ Նույն հիմքով նաեւ այսօր դատավոր Արտուշ Գաբրիելյանն է մերժել կալանավորելու միջնորդությունը։

Աղբյուր` Փաստինֆո