Փաստ ինֆո

Հայաստանի եւ Ղարաբաղի միջեւ հարաբերությունները մշտապես ռազմավարական են եղել եւ մշտապես խորացված են եղել։ Այնպես չէ, որ նախկինում ոչինչ չի եղել եւ հիմա վարչապետը դրանք պետք է խորացնի եւ նոր իմաստ հաղորդի: Այդպիսի բան չկա, ուղղակի դա ընդամենը վարչապետի փիար կամպանիան է՝ ցույց տալու համար, որ հեղափոխությունը նույնպես տարածվում է Ղարաբաղում, արմատներ է գցում»,-«Փաստինֆո»-ի հետ զրույցում այս մասին ասաց քաղտեխնոլոգ Արմեն Բադալյանը՝ անդրադառնալով ՀՀ իշխանությունների եւ Արցախի նորընտիր նախագահի հարաբերություններին եւ Հայաստան-Արցախ համագործակցության վերաբերյալ ՀՀ վարչապետ Նիկոլ Փաշինյանի հայտարարությանը:

Հիշեցնենք, ՀՀ վարչապետ Նիկոլ Փաշինյանն այսօր Արցախի նորընտիր նախագահ Արայիկ Հարությունյանի հետ հանդիպմանն ասել էր, որ ընտրություններից հետո ստեղծվել են բոլոր նախադրյալները, որպեսզի Հայաստանի և Արցախի կառավարությունները, իշխանությունները ռազմավարական, երկարաժամկետ ծրագրերի իրագործման փուլ անցնեն:

Անդրադառնալով Արցախում նոր կառավարության ձեւավորման եւ մասնավորապես ԱԳ նախարարի պաշտոնում Մասիս Մայիլյանի նշանակման հնարավորությանը, ինչի մասին ակտիվորեն գրում է մամուլը՝ նշելով, որ դա ՀՀ իշխանությունների ցանկությամբ է, քաղտեխնոլոգն ասաց, որ անգամ ԱԳ նախարարի պաշտոնում Մասիս Մայիլյանը ազդեցիկ դերակատարություն ունենալ չի կարող, հատկապես, այն բանից հետո, եթե Անվտանգության խորհրդի քարտուղար նշանակվի Սամվել Բաբայանը, որի հետ տանդեմի եւ նրանց թիկունքում կանգնած ուժերի միջեւ էլ, ըստ քաղտեխնոլոգի կընթանան հիմնական քաղաքական իրադարձություններն Արցախում:

Մյուս կողմից Արմեն Բադալյանը չի բացառում, որ Մասիս Մայիլյանի նշանակումը կարող է արեւմտամետ ուժերին բավարարելու նպատակ ունենալ: Միեւնույն ժամանակ, քաղտեխնոլոգը հիշեցրեց, որ Մայիլյանը ընտրությունների ժամանակ Արայիկ Հարությունյանի հիմնական մրցակիցն էր:
«Եթե այդ նշանակումը տեղի ունենա, այսինքն, Մասիս Մայիլյանը վերանշանակվի, կա կնշանակի, որ նա կորցնելու է ազնվորեն իրեն սատարողների վստահությունը եւ նա իրականում խաղ էր իրականացում, այդ պայքարը բլեֆ էր ու նա նախապես նախընտրական կամպանիա էր մտել պարտվելու տրամաբանությամբ, իսկ դա նշանակում է, որ տվյալ քաղաքական գործիչը այլեւս ապագա չունի: Նա ընդամենը անուն- ազգանուն է լինելու, ոչ ավելին եւ քաղաքական կշիռ չի ունենալու »,-ասաց Արմեն Բադալյանը:

Ինչ վերաբերում է Սամվել Բաբայանի եւ Մասիս Մայիլյանի ՝ ՌԴ մուտքի արգելքին, ինչի մասին հայտնի էր դարձել քարոզարշավի ընթացքում, քաղտեխնոլոգը սա խնդիր է համարում: Միեւնույն ժամանակ, քաղտեխնոլոգը չի բացառում, որ ՌԴ-ի վերաբերմունքը կարող է փոխվել առնվազն Սամվել Բաբայանի հետ կապված.«Արայիկ Հարությունյան-Սամվել Բաբայան տանդեմը Ռուսաստանի համար գուցե այդքան էլ մերժելի չլինի»:
Ինչ վերաբերում է թավշյա հեղափոխությունը Արցախ արտահանելու հարցին, դա այսուհետեւ փակված թեմա է եւ դա կարող էր տեղի ունենալ միայն Մասիս Մայիլյանի հաղթանակից հետո:

«Այնպես չէ, որ Արայիկ Հարությունյանը պատահական մեկն է եւ ինչ-որ տեղից եկել, ընտրվել է, նույնը վերաբերում է Սամվել Բաբայանին: Նրանք այն գործիչները չեն, որ հեղափոխական էյֆորիան Ղարաբաղում տարածեն ու հեղափոխականներ դառնան: Հատկապես Սամվել Բաբայանն այն մարդը չէ, որը կարող է ենթարկվել ՀՀ վարչապետին: Իրենք շատ լավ տեսնում են, որ Փաշինյանն այլեւս երկու տարի առաջվա վարչապետը չէ, իսկ նման դեպքերում շատ մեծ հարցականներ կան Հայաստան-Արցախ հարաբերություններում եւ հաստատ դա չի լինելու վերադաս-ստորադասի հարաբերություններ»-ընդգծեց Արմեն Բադալյանը՝ հիշեցնելով նախընտրական քարոզարշավի ընթացքում տարածված ձայնագրությունը, որտեղ Սամվել Բաբայանը , քաղտեխնոլոգի խոսքով, շատ կոպիտ պատասխան է տվել հենց Նիկոլ Փաշինյանին՝ հասկացնելով, թե ինչպես նրա հետ կվարվի անհրաժեշտության դեպքում:

«Այնպես որ, ՀՀ վարչապետը շատ բան կարող է խոսել, որովհետեւ նա շատ է սիրում խոսել, բայց այդ խոսքի տակ հիմք չկա: Իհարկե, նա կուզենա անել այն ինչ հայտարարում է, նա կուզենա Ղարաբաղն իրեն ենթարկել, բայց նա դա չկարողացավ անել: Մասիս Մայիլյանի պարտությունը հենց դա է փաստում»,-եզրափակեց Արմեն Բադալյանը:

Աղբյուր` Փաստինֆո