Փաստ ինֆո

Երկրով մեկ իրականացվում են շինարարական աշխատանքներ, սակայն դրանցից մի քանիսն ընդհատվել են, որովհետև չի իրականացվում տեխնիկական վերահսկողություն։ Եղել են ընկերություններ, որոնք ներկայացրել են բանկային կեղծ երաշխիքի փաստաթղթեր։ Այս մասին ԱԺ-ում կառավարության հետ հարցուպատասխանի ժամանակ ասաց ԱԺ «Լուսավոր Հայաստան» խմբակցության պատգամավոր Անի Սամսոնյանը։

Պատգամավորը, դիմելով վարչապետին, ասաց. «Կեղծ բանկային երաշխիքի փաստաթուղթ ներկայացրած ընկերություններից է «Ռաշըն Վոյաժ»-ը, որի տնօրենն ազգակցական կապ ունի Ղալումյան ընտանիքի հետ, իսկ Իջևանի համայնքապետի պաշտոնակատար Հայկ Ղալումյանը Ձեր մտերիմն է, Ձեր քավորը»,-ասաց Անի Սամսոնյանը՝ հետաքրքրվելով արդյոք այս դեպքի առթիվ հարուցվել է քրեական գործ, թե ոչ։

ՀՀ վարչապետ Նիկոլ Փաշինյանն ասաց, որ այդ դեպքը բացահայտել է Պետական վերահսկողության ծառայությունը և գործերն ուղարկվել են ԱԱԾ. «Որևէ կասկած չի կարող լինել, որ այդ գործը կարժանանա պատշաճ քննության։ Ինչ վերաբերում է կապերին, Հայաստանը փոքր երկիր է, որ շատ փորփրենք հնարավոր է Ձեր ընտանիքի հետ էլ կապեր գտնվեն։ Ես կհանձնարարեմ՝ անպայման այդ հարցը գտնեն։ ՀՀ-ում շատ քիչ կան մարդիկ, որոնք կապի կապի կապի կապով իրար հետ կապված չեն։ Եթե Դուք ակնարկում եք, որ կեղծ երաշխիքները կարող են իշխանության հետ կապ ունենալ, Դուք սխալ պատկերացում ունեք գործող իշխանության մասին։ Յուրաքանչյուրն իր մտապատկերի շրջանակում պետք է պատկերացում կազմի կառավարության հնարավոր գործողությունների մասին։ Այս երկրում իմ քեռու տղան ենթարկվել է քրեական պատասխանատվության և կասկած չունենաք, որ Ձեր քեռու տղան էլ օրենք խախտելու պարագայում կենթարկվի քրեական պատասխանատվության և Ձեր ընդդիմադիր պատգամավոր լինելը չի փրկի նրան»,-ասաց վարչապետը։

Մանրամասները՝ տեսանյութում։

Աղբյուր` Փաստինֆո