Փաստ ինֆո

Օրեր առաջ ձերբակալված, ապա ազատ արձակված քաջարանցիներից երեքին մեղադրանք է առաջադրվել։ Այս մասին «Փաստինֆո»-ին հայտնեցին նրանց պաշտպանները՝ նշելով, որ վարույթն իրականացնող մարմինը միջնորդություններ է ներկայացրել դատարան՝ նրանց նկատմամբ որպես խափանման միջոց կալանավորումն ընտրելու մասին։

Զանգեզուրի պղնձամոլիբդենային կոմբինատի աշխատակցի եղբորը՝ Լևոն Համբարձումյանին, մեղադրանք է առաջադրվել ՀՀ քրեական օրենսգրքի 131-րդ հոդվածի 2-րդ մասի 1-ին կետով՝ մի խումբ անձանց կողմից նախնական համաձայնությամբ անձին առևանգելու համար։ Նրա պաշտպան Վարդուհի Էլբակյանը «Փաստինֆո»-ի հետ զրույցում ասաց, որ իր պաշտպանյալն առաջադրված մեղադրանքը չի ընդունում։

Խորեն Միրզոյանի պաշտպան Հովսեփ Սարգսյանը «Փաստինֆո»-ի հետ զրույցում ասաց, որ իր պաշտպանյալը եւս չի ընդունում առաջադրված մեղադրանքը. «Այն ինչ նկարագրված է մեղադրանքի որոշման մեջ, ընդհանրապես գոյություն չունի, նման գործողություններ Խորեն Միրզոյանը չի կատարել։ Վերագրվում է արարք, որը հնարավոր չէր կատարել»։

Ավելի վաղ «Փաստինֆո»-ն տեղեկացրել է, նրանց դեմ ցուցմունք տվող անձը հրաժարվել է իր նախնական ցուցմունքից և հայտարարել, դրանք տվել է ճնշման տակ եւ որ իրեն տուժող չի ճանաչում՝ Սարգսյանն ասաց, որ կալանքի միջնորդության քննարկման ժամանակ դատարանում կբարձրաձայնի այդ հարցը՝ վկայակոչելով «Փաստինֆո»-ի տեղեկատվությունը։ «Նյութերը մեզ տրամադրվել է։ Ինչու՞ մեզ չի տրամադրվել այն փաստական տվյալը, ցուցմունքը, որ տուժողը հրաժարվել է իր ցուցմունքներից։ Ես լրատվությունից եմ տեղեկացված»,- ասաց Սարգսյանը։

Հարցին, թե արդյո՞ք իր վստահորդի մասնակցությամբ առերես հարցաքննություն է եղել, Սարգսյանը պատասխանեց. «Մենք շատ խնդրել ենք, պահանջել ենք և միջնորդություն ենք ներկայացրել, որ վարույթն իրականացնող մարմինն առերես հարցաքննի Խորեն Միրզոյանի դեմ վկայած անձանց, բայց այս պահին ձայն բարբառո հանապատի, որևէ արձագանք չունենք»։

Սարգսյանը նշեց, որ քիչ առաջ իմացել է, որ դատավորը, որը կքննի Միրզոյանի նկատմամբ որպես խափանման միջոց կալանավորումն ընտրելու մասին միջնորդությունը՝ դատավոր Ռոբերտ Պապոյանն է։ Գործով մյուս մեղադրյալ՝ Մարատ Ստեփանյանի պաշտպան Լուսինե Մարտիրոսյանը «Փաստինֆո»-ին հայտնեց, որ իր պաշտպանյալը ևս չի ընդունում առաջադրված մեղադրանքը։

Նրա փոխանցմամբ՝ ներկայացվել է երկու միջնորդություն, որոնց վերաբերյալ պատասխան դեռևս չեն ստացել և պատասխանը ստանալուց հետո դիրքորոշումն ավելի հստակ կլինի՝ հետագա գործողությունների հետ կապված։ Ներկայացված միջնորդությունների մասին պաշտպանը մանրամասներ չներկայացրեց։ Լուսինե Մարտիրոսյանը նշեց, որ Մարատ Ստեփանյանի մասնակցությամբ առերեսում չի եղել, բայց պաշտպանական կողմն առերեսման պահանջ է ներկայացրել. «Ի սկզբանե հայտարարել ենք, որ ակնհայտ անհիմն մեղադրանք է և սուտ տեղեկություն է ներկայացվել»։

Մարատ Ստեփանյանի խափանման միջոցի հարցը կքննարկի դատավոր Արտուշ Գաբրիելյանը, իսկ Լևոն Համբարձումյանի խափանման միջոցի հարցը՝ դատավոր Վաչե Մարգարյանը։
Ավելի վաղ տեղեկացրել ենք, որ մայիսի 24-ին Երեւանից հատուկ ջոկատայիններ են գործուղվել Սյունիք հատուկ գործողություններ իրականացնելու նպատակով: Վաղ առավոտյան սպեցնազն անցել է գործի եւ 4 անձ բերման է ենթարկվել։ Հետագայում՝ մեկ հոգին ազատ է արձակվել. Հայտարարվեց, թե Նրան սխալմամբ էին բերման ենթարկել ու հենց նրա նկատմամբ էլ ոստիկանության բաժնում բռնություն է գործադրվել։ Համենայն դեպս՝ երեկ մամուլում տարածվել էր բռնության հետքերով լուսանկարները։ Ոստիկանության բաժնի մոտ հավաքվել էին մեծ թվով քաջարանցիներ՝ պահանջելով ազատություն ու արդարություն։ Նրանք բողոքի ակցիան դադարեցրին միայն այն բանից հետո, երբ Քաջարանի համայնքի ղեկավարը հայտարարեց, որ իրեն հավաստիացրել են, որ ոստիկանության բաժնում կիրառված բռնության դեպքի առթիվ պատշաճ քննություն կընթանա։
Ակցիայի ավարտից հետո հաղորդագրությամբ հանդես եկավ նաեւ ՔԿ-ն նշելով, որ ձերբակալվածները կասկածվում են մարդ առեւանգելու մեջ։

«Նախաքննության ընթացքում պարզվել է, որ Քաջարանի բնակիչներ Գ․ Մ․-ի և նրա ընկերոջ՝ Կ․ Թ․-ի միջև տեղի ունեցած վեճի հանգամանքների պարզաբանման համար Քաջարան համայնքի ղեկավարի կանչով, 2020թ. ապրիլի 26-ին՝ ժամը 20:00-ի սահմաններում, Քաջարանի Լեռնագործների փողոցում գտնվող, վերջինիս պատկանող բենզալցակայանի հետնամասում գտնվող չգործող նախկին ռեստորանի շինությունում հավաքվել են համայնքի ղեկավարը և շուրջ 20 հոգի, որտեղ տեղի է ունեցել ծեծկռտուք։

2020թ. ապրիլի 29-ին՝ ժամը 13:30-ի սահմաններում, Զանգեզուրի պղնձամոլիբդենային կոմբինատի աշխատակիցներ Բ․ Հ․-ն, նրա եղբայրը՝ Լ․ Հ․-ն, Խ․ Մ․-ն և Մ․ Ս․-ն, կոմբինատի ավտոկայանատեղիում բռնություն գործադրելով, առևանգել են Շ. Մ․-ին և Խ.Մ․-ի կողմից վարվող ավտոմեքենայով տեղափոխել «Աժդանակ» ՍՊԸ-ի տարածք, Ա․ Հ․-ի և Գ․ Մ․-ի հետ ծեծի ենթարկել նրան:

Շուրջ կես ժամ ծեծելուց հետո, Շ. Մ․-ին « Տոյոտա-Պրադո» մակնիշի ավտոմեքենայով տեղափոխել են Ագարակ բնակավայրում գտնվող, Ա․Պ․-ին պատկանող առանձնատուն, որտեղ կրկին ծեծել են նրան, ինչին միջամտել են Շ.Մ․-ի եղբայրը՝ Գ.Մ․-ն և Ա․Փ․-ն, ինչպես նաև ինքնությունները չպարզված անձինք, ինչի հետևանքով ծեծկռտուքը դադարել է: Քրեական գործի նախաքննության ընթացքում, Ա․Պ․-ի բնակության վայրում կատարված խուզարկությամբ հայտնաբերվել է առանձնապես խոշոր չափի «մարիխուանա» տեսակի թմրամիջոց։

2020թ․մայիսի 24-ին Խ․ Մ-ն, Մ․ Ս-ն և Լ․ Հ-ն ձերբակալվել են` ՀՀ քրեական օրենսգրքի 131-րդ հոդվածի 2-րդ մասի 1-ին կետով, իսկ Ա․Պ-ն՝ ՀՀ քրեական օրենսգրքի 268-րդ հոդվածի 3-րդ մասով նախատեսված հանցագործություններ կատարելու կասկածանքով»,- հայտարարել է ՔԿ-ն։

Նշենք, որ ձերբակալվածներն ազատ էին արձակվել, քանի դատարանն արձանագրել էր, որ ձերբակալման մասին որոշումը եղել է ոչ իրավաչափ։

Հեղինակ՝ Իզաբել Սահակյան

Աղբյուր` Փաստինֆո