Փաստ ինֆո

Փաստաբանները մինչև իշխանափոխությունը եւս ունեցել են խնդիրներ։ Ծանր քրեական գործերով փաստաբանը միշտ էլ թիրախավորվել է։ Այս մասին «Փաստինֆո»-ի եթերում ասել է Փաստաբանների պալատի նախագահ Արա Զոհրաբյանը։

«Անուղղակի ձևով փաստաբանին նույնացրել են իր վստահորդի հետ, մտածել են, որ նա օգնում է, որ մեղադրյալը խուսափի պատասխանատվությունից՝ առանց պատկերացնելու, որ, եթե փաստաբանը պաշտպանությունը ճիշտ չկազմակերպի, ապա հնարավոր է, որ լրիվ անմեղ մարդ դատապարտվի։ Հենց այդ կոնֆլիկտի, մրցակցության արդյունքում է, որ այդ ապացույցները կրակի միջով անցնում են, դառնում են հստակ ապացույցներ »,- ասաց Զոհրաբյանը։

Նա ընդգծեց, որ նախկինում իշխանությունը վախենում էր հասարակությունից և հիմնականում իշխանական որոշ մարմինների կողմից էին փաստաբանները ճնշման ենթարկվում, հասարակության որոշ խմբերի կողմից՝ կապված կոնկրետ մասնավոր գործերով։

«Այսօր հասարակությունը կամ հասարակության մի ակտիվ խումբ իշխանության հետ է և, եթե փաստաբանը մի մարդու է պաշտպանում, ով հասարակության կողմից ընկալվում է որպես անցանկալի մարդ, այդ փաստաբանը նույնացվում է իր վստահորդի հետ և նույն անեծքներին, հայհոյանքներին է արժանանում՝ ինչպես նրա վստահորդը»,- ասաց Զոհրաբյանը։

Նա տեղեկացրեց, որ վերլուծել են, թե 2018թ հունվարի 1-ից մինչև 2020թ հունվարի 1-ն ընկած ժամանակահատվածում փաստաբանների հետ կապված ինչ միջադեպեր են տեղի ունեցել և ցուցակը բավականին մեծ է։

ՓՊ նախագահը նշել է, որ այսօր իշխանական օղակների կողմից փաստաբանությունը շատ վատ է նայվում, ինչի մասին է վկայում նաև այն, որ փաստաբանության 101- ամյակի կապակցությամբ շնորհավորական խոսք չեն ստացվել ոչ՛ նախագահի կողմից, ո՛չ վարչապետի։

«Մենք միշտ ենք մեզ բարիկադի մյուս կողմում համարել, որովհետև ցանկացած պետական մարմնի հետ կոնֆլիկտի ժամանակ ուզես-չուզես կանգնում ես պաշտպանության կարիք ունեցող մարդու կողքին։ Մենք սովոր ենք, որ հակառակորդ կողմը քեզ վատ աչքերով է նայում, բայց դա չպետք է համակարգային լինի»,- ասաց Զոհրաբյանը։

Մանրամասները՝ տեսանյութում։

Աղբյուր` Փաստինֆո