Փաստ ինֆո

«Օրինականության հետ կապված խնդիր կա, արվում է մի բան, որը կանխատեսելի չէ հանրության համար, որովհետեւ ԱԺ-ի լիազորությունները սահմանված են Սահմանադրության մեջ, իսկ այնտեղ նման բան չկա: Սա նշանակում է , որ մենք կրկին ունենք հերթական խնդիրը, օրինականության հետ»,- «Փաստինֆո»-ի հետ զրույցում նման կարծիք հայտնեց մարդու իրավունքների հարցերով միջազգային փորձագետ Արա Ղազարյանը՝ անդրադառնալով «Հանրաքվեի մասին» սահմանադրական օրենքում նախատեսվող փոփոխություններին:

Հիշեցնենք, խորհրդարանը, քննարկում է իշխող մեծամասնության նախաձեռնած փոփոխությունները, որոնց նպատակն է ԱԺ-ին լիազորություն տալ չեղարկել հայտարարված սահմանադրական հանրաքվեն: Նշենք, որ սահմանադրական հանրաքվեի անցկացնել-չանցկացնելու խնդիրը փակուղի է մտցրել իշխանությանը, որը պատճառաբանելով կորոնավիրուսով պայմանավորված իրավիճակը, փորձում է իր ՍԴ գործող կազմից ազատվելու նպատակով հայտարարված սահմանադրական հանրաքվեն չեղարկել եւ այժմ մեխանիզմների փնտրտուքի մեջ է: Ավելին, արդարադատության նախարարությունն անգամ Վենետիկի հանձնաժողով հարցում է ուղարկել խնդրի հետ կապված:

Արա Ղազարյանի խոսքով, առհասարակ ՍԴ-ում ճգնաժամ գոյություն չունի: Այն քաղաքական խնդիր է: «Ես գտնում եմ, որ այնտեղ ճգնաժամ չկա: Ի՞նչ ճգնաժամի մասին է խոսքը, այնքան կարեւոր որոշումներ ենք ՍԴ-ից ստացել, մեկ ամսի առաջ, օրինակ, շատ կարեւոր՝ «Օպերատիվ հետախուզական գործունեության մասին» չափազանց կարեւոր որոշում կայացվեց: Այդ որոշումները պրակտիկայում կիրառում ենք: Իմ նշած որոշման մասին նույնիսկ դատարանում տեղյակ չէին մեկ շաբաթ առաջ, անգամ ընդմիջում վերցրեց դատարանը, որ ծանոթանա: Հիմա, ես՝ որպես իրավաբան, ի՞նչ ճգնաժամի մասին կարող եմ խոսել: Քաղաքական գործիչներն են այնտեղ ուզում ճգնաժամ տեսնել»-եզրափակեց Արա Ղազարյանը:

Աղբյուր` Փաստինֆո