Փաստ ինֆո

ՀՀ Ընտրական օրենսգրքում և կից ներկայացված օրենքներում փոփոխություններ և լրացումներ կատարելու մասին նախագծով առաջարկվում է մինչև 4000 ընտրող ունեցող համայնքներում տեղական ինքնակառավարման մարմինների ընտրություններն անցկացնել մեծամասնական ընտրակարգով,իսկ 4000 և ավելի ընտրող ունեցող համայնքներում պետք է լինեն համամասնական ընտրակարգով ընտրություններ, որին մասնակցելու են քաղաքական կուսակցությունները և դաշինքները: Այս մասին այսօր ԱԺ ամբիոնից՝ ներկայացնելով նախագիծն, ասաց Տարածքային կառավարման և ենթակառուցվածքների նախարար Սուրեն Պապիկյանը։

Նա նշեց՝ փոփոխություններ են առաջարկվում նաև համայնքների ավագանիների թվաքանակի, ընտրական գրավի չափի, նախըտրական հիմնադրամների ձևավորման վերաբերյալ կարգավորումներում. «Առաջարկվում է մանդատների բաշխմանը մասնակցելու համար կուսակցությունների անցողիկ շեմը սահմանել 4 տոկոս՝ գործող 6-ի փոխարեն, իսկ կուսակցությունների դաշինքի համար 6 տոկոս՝ գործող 8-ի փոխարեն»։

«Մեր համայնքներում հաճախ շարունակում են առաջնորդվել ազգակցական, ընկերական, բարեկամական մոտեցումներով, և իրենք ձայն են տալիս իրենց համայնքի բնակչին։ Երբ խոսում ենք շահից, բոլոր քաղաքական ուժերի շահը պետք է լինի տվյալ համայնքից ունենալ թեկնածու»,-ասաց Պապիկյանը։
Նա ընդգծեց, որ այս նախագիծն առաջին հերթին նրա համար է, որ կարողանան հանրությունից դուրս հանել , կոտրել, ջարդել այն մտածողությունը, որը հենված է ազգակցական կապերի ու հաճախ նաև կրիմինալ կապերի վրա։

«Այդ համայնքապետերին ընտրել է ժողովուրդը՝ տարբեր կերպ: Բայց մենք հիմա հնարավորություն ենք ընձեռելու, որպեսզի Հայաստանի քաղաքացին իր համայնքում հաստատի իր իշխանությունն ամբողջությամբ, ինքը որոշի՝ ով լինի իր համայնքի ղեկավարը: Կարող են նաև այդ համայնքի ղեկավարները լինել նախկինում ընտրվածները, ես չգիտեմ, դա կախված է տվյալ մարդկանց հեղինակությունից, անցած ճանապարհից: Այս կարգավորումը շտկում է մտցնելու բոլոր խնդիրների մեջ, և նաև այս թեման մեկընդմիշտ փակելու է»,- հավելեց Պապիկյանը:

Աղբյուր` Փաստինֆո