Փաստ ինֆո

Դանիելյան Արմենը ՀՀ այն բացառիկ դատավորն է Վերաքննիչ ատյանի՝ 18 դատավորներից, որ մեկ տարվա ընթացքում երկու անգամ Ռոբերտ Քոչարյանի անձնական երաշխավորության միջնորդությունները պետք է քննության առարկա դարձնի՝ վերաքննիչ ատյանում։ Այս մասին լրագրողների հետ զրույցում ասաց ՀՀ երկրորդ նախագահ Ռոբերտ Քոչարյանի պաշտպանական խմբի անդամ Արամ Վարդևանյանը։

«Եթե ՀՀ-ում կա մեկը, որ կարող է սա դիտարկել պատահականություն, ես իսկապես կցանկանամ խոսել այդ մարդու հետ, որ ինքս էլ հասկանամ, թե ոնց կարող է դա լինել պատահականություն։ Պարզ է, չէ՞, որ մի դեպքում մենք խոսում ենք երկու ԱՀ նախագահների մասին, այս դեպքում՝ չորս վարչապետների և Աննա Դանիբեկյանի համար այդ չորս անձանց ներկայացրած միջնորդությունը դատական ակտում նույնիսկ չի վերլուծվել։ Դուք կարող եք կարդալ դատական ակտը, որը թվացյալ ծավալուն է, բայց միայն մեկ էջն է, որ վերաբերում է վերլուծության։ Սա է մակարդակն արդարադատության»,-ասաց Վարդևանյանը, ապա հավելեց. «Այդ ինչպե՞ս է ստացվում, որ, երբ կարծես բոլորի համար պարզ է, որ այդ միջնորդությունը պետք է բավարարվի, ոչ մի ուրիշ դատավորի չի մակագրվում, երբ Աննա Դանիբեկյանը երկու ամիս չի ներկայանում։ Ամեն դեպքում սպասում են մինչև Աննա Դանիբեկյանը գա, իսկ վերաքննիչ ատյանում՝ Արմեն Դանիելյան։ Արմեն Դանիելյանն արդարադատություն և դատարան Ռոբերտ Քոչարյանի գործով չի կարող լինել»։

Վարդևանյանի խոսքով՝ խափանման միջոցը, որը պետք է անհապաղ քննվի, չեն մակագրում և սպասում են մինչև Աննա Դանիբեկյանը գա և մերժի։

«Դա դիտարկել պատահականություն ինձ մոտ չի ստացվում։ Եթե կարողանան ներկայացնել, թե ինչով է դա պատահականություն՝ 12 ամսվա մեջ երկու անձնական երաշխավորություն։ Կամ այդ համակարգիչն ունի բացառիկ ալգորիթմ, որը, երևի թե տեղեկատվական տեխնոլոգիաների մասնագետները հավուր պատշաճի կպարզաբանեն »,- ասաց Վարդևանյանը՝ նշելով, որ խոսքը դատավորի անձով չէ պայմանավորված։

«Պարզապես պետք է հաշվի առնել, որ խոսում ենք մի դատավորի մասին, որը ոչ միայն խախտեց Ռոբերտ Քոչարյանի իրավունքները՝ կոպտորեն, այլև՝ զրկեց փաստաբաններին արտահայտվելու հնարավորությունից։ Արտահայտվելու հնարավորությունից փաստաբաններին զրկելը նույնիսկ Սոմալիում կարող ենք չհանդիպել։ Սոմալիում գիտե՞ք ինչքան իրավունքների խախտումներ կան, բայց առնվազն փաստաբանին խոսքից զրկել այնտեղ չի լինում։ Արմեն Դանիելյանը դա էլ էր արել»,- ասաց Վարդևանյանը։

Հիշեցնենք, որ Արմեն Դանիելյանը այն դատավորն է, որը բեկանել էր Երևանի Ռոբերտ Քոչարյանին 2019թ. մայիսի 18-ին ազատ արձակելու և մայիսի 20-ին Ռոբերտ Քոչարյանի և մյուսների գործով գործի վարույթը կասեցնելու և ՍԴ ուղարկելու մասին որոշումները։ Նա ունի ամենացածր վարկանիշը։ Բացի այդ՝ Մայիսի 13-ին Երևանի ընդհանուր իրավասության դատարանը՝ դատավոր Աննա Դանիբեկյանի նախագահությամբ, մերժեց Ռոբերտ Քոչարյանի խափանման միջոցի վերաբերյալ միջնորդությունները,որի դեմ պաշտպանական կողը վերաքննիչ բողոք է ներկայացրել։ Վերաքննիչ բողոքը մակագրվել էր Արմեն Դանիելյանին, ինչի պատճառով պաշտպանները ետ են վերցրել բողոքները։

Աղբյուր` Փաստինֆո