Փաստ ինֆո

Ադրբեջանի կողմից մի շարք փորձեր են իրականացվել Ռամիլ Սաֆարովի ներման գործողությունն արդարացնելու նպատակով։ Այս մասին լրագրողների հետ հանդիպման ժամանակ ասաց Գուրգեն Մարգարյանի գործով ՄԻԵԴ-ում դիմումատուների փաստաբան Լևոն Գևորգյանը։

Նրա խոսքով Ադրբեջանի Հանրապետությունը բազմիցս փորձել է արդարացնել իր գործողությունները Եվրոպայի խորհրդի էքստրադիցիայի կոնվենցիայի իրավակարգավորումներով, սակայն այս արդարացումը դատարանի կողմից չի ընդունվել. «Բազմաթիվ փորձեր են արվել հիմնավորել, Ռամիլ Սաֆարովի իբրև թե հոգեկան խանգարումները, սթրեսային իրավիճակները, սակայն այս արդարացումը նույնպես չի անցել և ՄԻԵԴ-ը փաստացի արձանագրել է, որ Ադրբեջանի կողմից տեղի է ունեցել կյանքի իրավունքի ընթացակարգային կողմի խախտում, այսինքն՝ չի ապահովվել պատշաճ պատիժը, որը համահունչ կլինի համապատասխան անձի կողմից իրականացված հանցագործությանը»,-ասաց փաստաբանը՝ նկատելով, որ տվյալ գործի շրջանակում դեռևս աշխատանք պետք է կատարեն։

Փաստաբանը նշեց, որ ՄԻԵԴ-ի պրակտիկայում աննախադեպ փորձ է իրականացվել՝ մասնավոր կարգավիճակում կատարված գործողությունը վերագրել պետությանը՝ պետության կողմից արված հայտարարությունների և գործողությունների հիման վրա. «Ողջ վարույթի ընթացքում մեր պնդումը եղել է այն, որ Ադրբեջանը ոչ միայն պատասխանատու է նրա համար, որ հետամուտ չի եղել տվյալ անձի պատժին ու նաև արդարացրել, այնուհետև հերոսացրել է, այլև Ադրբեջանի Հանրապետությունն իր գործողություններով ընդունել և ճանաչել է Ռամիլ Սաֆարովի գործողությունները որպես սեփական։ Պետությունը դա արել է նրան ռազմական աստիճան շնորհելու, բնակարան պարգևելու և այլ ճանապարհներով։ Տվյալ պարագայում ՄԻԵԴ-ը մեր փաստարկների հետ չի համաձայնվել, և մենք այստեղ տեսնում ենք նաև հետագա աշխատանք անելու, հավանականություն նաև խնդիրը բարձրացնելու ՄԻԵԴ բարձր պալատի առջև»,-ասաց Լևոն Գևորգյանը։

Աղբյուր` Փաստինֆո