Փաստ ինֆո

Երևանի ընդհանուր իրավասության դատարանում ՝դատավոր Մնացական Մարտիրոսյանի նախագահությամբ, այսօր կայացել է ԵԿՄ նախկին նախագահ, ԱԺ նախկին պատգամավոր Մանվել Գրիգորյանի գործով դատական նիստը։ Այսօրվա դատական նիստին պաշտպանները միջնորդություն են ներկայացրել՝ պետական հարկային պարտավորությունները և շարժական-անշարժ գույքի գույքահարկը վճարելը թույլատրելու մասին։ Մասնավորապես՝ պաշտպանական խմբի անդամ Լևոն Բաղդասարյանը նշեց, որ «Արա և Այծեմնիկ» ընկերության հաշիվների վրա դրված է արգելանք, ինչի պատճառով ընկերությունը չի կարողանում կատարել պետության նկատմամբ հարկային պարտավորությունները։ Ներկայացված միջնորդությանը միացան նաև պաշտպանական խմբի մյուս անդամները։ Պաշտպանական խմբի անդամ Գուրգեն Գրիգորյանը նշեց, որ ընթացիկ պարտավորությունները կատարելու համար խոչընդոտներ է հանդիսանում։

Նրա խոսքով՝ Հարկադիր կատարման ծառայությունում վարույթ էր հարուցված և միայն որոշակի գույք վաճառելուց հետո հնարավոր եղավ փակել պարտքը։ Նա նաև տեղեկացրեց, որ խոսքը գնում է 41 մլն դրամի մասին։ 

Մեղադրող դատախազը նշեց, որ նախկինում հրավիրված դատական նիստերից մեկի ժամանակ դատարանը վերացրել է ընկերության գույքի վրա դրված կալանքը, ինչից կարելի է ենթադրել, որ ընկերության հաշիվների վրա դրված արգելանքը ևս պետք է վերացված լինի։ Կողմերի դիրքորոշումը լսելուց հետո նախագահող դատավոր Մնացական Մարտիրոսյանն արձանագրեց, որ դատարանին որևէ փաստարկ չի ներկայացվել, թե ինչ 41 մլն դրամի, գույքահարկի, հարկային պարտավորությունների մասին է խոսքը և անհրաժեշտ է բոլոր փաստաղթերը ներկայացնել։ Դատարանը որոշեց հետաձգել միջնորդության լուծումը՝ մինչև միջնորդության վերաբերյալ որոշում ընդունելու համար էական հանգամանքների պարզումը, այսինքն՝ դատարանին պետք է ներկայացվեն փաստաթղթեր։

Այսօրվա դատական նիստին միջնորդություն ներկայացրեց նաև մեղադրող դատախազը՝ Մանվել Գրիգորյանի առողջական վիճակի վերաբերյալ, մասնավորապես դատախազը միջնորդեց ԲԿ համապատասխան գրություն ուղարկել՝ պարզելու, թե ինչ հաճախականությամբ է Մանվել Գրիգորյանի համար շտապօգնության կանչ գրանցվել։

«Արդյո՞ք Մանվել Գրիգորյանի առողջական վիճակը վատանում է դատական նիստերից մեկ-երկու օր առաջ, թե պարբերական բնույթ է կրում»,- ասաց նա՝ հավելելով, որ այդպես հնարավոր է նաև պարզել, թե արդյո՞ք Մանվել Գրիգորյանը խուսափում է ներկայանալ դատական նիստերին։
Պաշտպան Լևոն Բաղդասարյանն էլ արձագանքեց՝ նշելով, որ Մանվել Գրիգորյանը գտնվում է ծայրահեղ ծանր վիճակում և մշտապես բժիշկների հսկողության ներքո է ։

«Մանվել Գրիգորյանն այն հիվանդը չէ, որ շտապօգնության կանչի միջոցով ճշտեն՝ անձի հիվանդության աստիճանը »,- ասաց Բաղդասարյանը։
Լսելով կողմերի դիրքորոշումը՝ դատավոր Մնացական Մարտիրոսյանը որոշեց այս միջնորդության լուծումը ևս հետաձգել, մինչև մեղադրանքի կողմը ներկայացնի բավարար հիմքեր։

Հիշեցնենք՝ Մանվել Գրիգորյանը մեղադրվում է ապօրինի զենք-զինամթերք պահելու, ավելի քան 101 միլիոն դրամի գույք յուրացնելու, ավելի քան 1 միլիարդ դրամի հարկերի վճարումից խուսափելու, պետական միջոցներից ավելի քան 1 միլիարդ դրամ վատնելու և շորթմամբ 37 միլիոն դրամ արժողությամբ գույքի հափշտակություն կազմակերպելու մեջ:

Աղբյուր` Փաստինֆո