Փաստ ինֆո

Ոստիկանության համակարգի ծառայողների պաշտոնատար անձինք խախտում են իրավունքները, մինչդեռ՝ ենթադրաբար պետք է պայքարեն հանուն իրավունքի «Փաստինֆո»-ի հետ զրույցում ասաց փաստաբան Գոռ Գևորգյանը։

Տվյալ դեպքում փաստաբանի ներկայացրած՝ պաշտոնատար անձի կողմից լիազորությունների ենթադրյալ չարաշահման դեպքն արձանագրվել է թմրամիջոցների ապօրինի շրջանառությանը վերաբերող քրեական գործով։

Գոռ Գևորգյանը Մեծամոր քաղաքի բնակիչ Մուրադ Մուրադյանի պաշտպանն է, որը մեղադրվում է թմրանյութեր պահելու մեջ։ Պաշտպանի խոսքով՝ Մուրադյանն ընդունում է, որ օգտագործել և պահել է թմրանյութ, սակայն վստահեցնում է, որ ոստիկանության բաժնում անձնական խուզարկությամբ հայտնաբերված մարիխուանա տեսակի թմրանյութի ծավալը փոխվել է. արձանագրման գրամի և հետագա փորձաքննությամբ ստացված եզրակացության մեջ կա տարբերություն։

«Սովորաբար նման դեպք լինում է, երբ կշեռքների մեջ տարբերություն է լինում և փորձագետի կշեռքը պետք է ենթադրաբար ավելի ճշգրիտ լինի, քան ոստիկանության բաժնի կշեռքը»,- նշեց Գևորգյանը։ Սակայն կոնկրետ այս դեպքում, ըստ փաստաբանի, խոսքը գնում է դիտավորյալ կատարված կեղծիքի մասին, քանի որ թմրամիջոցի ծավալի փոփոխությունը զգալի է։

Նրա խոսքով՝ կեղծիքն ապացուցվում է նաեւ ոստիկանության բաժնում թմրամիջոցը կշռելու գործողության ձայնագրությամբ։

«Ձայնագրությամբ փաստվում է, որ խուզարկության արդյունքում հայտնաբերված թմրամիջոցի քանակը չի համապատասխանում արձանագրության մեջ նշված թվին։ Այսինքն՝ ձայնագրության մեջ լսվում է մի թիվ, որն իրականում արձանագրության մեջ այլ դրսևորում է ստանում»,- ասաց Գևորգյանը՝ հավելելով, որ ոստիկանության ծառայողների գործողություններում առկա է կամ պաշտոնեական կեղծիքի հանցակազմ, կամ շատ ավելի ծանր հանցագործության։

Փաստաբանը հանցագործության մասին հաղորդում է ներկայացրել ՀՔԾ, որի հիման վրա հարուցվել է քրեական գործ։ ՀՔԾ-ում քննվող քրեական գործի շրջանակներում Մուրադյանը ճանաչվել է որպես տուժող, իսկ ոստիկանության ծառայողներից երկուսին՝ օպերլիազորին և ոստիկանության բաժնի պետի օպերատիվ գծով տեղակալին մեղադրանք է առաջադրվել՝ ՀՀ քրեական օրենսգրքի 308-րդ հոդվածով, իսկ օպերլիազորը մեղադրվում է նաև պաշտոնեական կեղծիք կատարելու մեջ։

Փաստաբանի խոսքով՝ քննչական մարմնին է ներկայացվել նաև Մուրադյանի կողմից արված ձայնագրությունը, որտեղ նաև երևում է, թե ինչպես է ոստիկանության բաժնի օպերատիվ գծով տեղակալը ուղղորդում իր վստահորդին՝ կեղծ տվյալներ հայտնի ձեռք բերման աղբյուրի վերաբերյալ։ Մասնավորապես՝ ոստիկանության պաշտոնյան հորդորել է հայտնել, թե թմրանյութը ձեռք է բերել մոտիկ գյուղերից մեկի վարչական տարածքից, մինչդեռ՝ Մուրադյանը ոստիկանությունում հայտնել է, որ թմրանյութը ձեռք է բերել ֆեյսբուք սոցիալական ցանցի միջոցով։

Փաստաբանը գտնում է, որ ոստիկանության ծառայողները նման քայլերի են դիմում ցուցանիշն ապահովելու համար։

«Ոստիկանության առջև ծառացած և համակարգային խնդիր է «ցուցանիշ» ասվածը։ Ցուցանիշը նախորդ տարվա իր բացահայտման թվին մոտ բացահայտումն է կամ դրանից ավել բացահայտումն է, որը խրախուսվում է»,- ասաց նա։

Այսինքն՝ թմրամիջոցի ձեռք բերման աղբյուրի չբացահայտված դեպք չունենալու համար ուղղորդել են նշել, թե դաշտից է այն հավաքել։

Գևորգյանը նշեց, որ նախկինում եղել է ոստիկանության համակարգի մաս, սակայն երբևէ չի հավատացել, որ ոստիկանության ծառայողը կարող է կեղծիքի գնով կամ մեկ այլ ծանր հանցագործության գնով խաղա անձի ճակատագրի հետ ցուցանիշն ապահովելու համար։

«Մենք չենք հերքում, որ Մուրադ Մուրադյանի մոտ գտնվել է որոշակի քանակությամբ մարիխուանա տեսակի թմրանյութ, Մուրադ Մուրադյանն ինքն է հայտարարել, երբ բերման է ենթարկվել։ Բայց լավ գիտակցելով, որ հայտնաբերված թմրամիջոցի գրամը չի բավականացնի Մուրադյանին քրեական պատասխանատվության ենթարկելու համար, գնացել են այնպիսի քայլով, որ գրամն ավելանա և ապահովի քրեական պատասխանատվության համար նախատեսված գրամի չափը՝ 2.5 գրամը»,- ասաց Գևորգյանը։

Նշենք, որ քրեական հետապնդման համար նախատեսված չափը կազմում է 2.5 գրամը, իսկ դրանից նվազ թմրանյութը նախատեսում է վարչական պատասխանատվություն, ինչը փաստաբանի խոսքով՝ այլ ցուցանիշով է հաշվարկվում, իսկ քրեական պատասխանատվությունն՝ այլ։

«Գործ ունենք զուտ ցուցանիշի համար մղվող պայքարի հետ, որի արդյունքում տուժեց Մուրադ Մուրադյանը, նրա իրավունքները»,- ասաց նա։

Հեղինակ՝ Իզաբել Սահակյան

Աղբյուր` Փաստինֆո