Փաստ ինֆո

Մայիսի 24-ի տվյալներով՝ Գեղարքունիքի մարզում կորոնավիրուսի վարակման դեպքերի թիվը հասել է 369-ի, միայն մեկ օրվա ընթացքում 35 նոր դեպք է գրանցվել, 26-ն ապաքինվել են։ Այս մասին «Փաստինֆո»-ի հետ զրույցում ասաց Գեղարքունիքի մարզպետ Գնել Սանոսյանի խորհրդական Լիանա Հովհաննիսյանը։ 

Նրա փոխանցմամբ՝ 35 դեպքից 32-ը Սևանի տարածաշրջանից են, իսկ 24-ը՝ Սևան քաղաքից։
Հովհաննիսյանը տեղեկացրեց, որ Սևան քաղաքում վարակվածության մեծ թիվ կա և միայն Սևանում հաստատվել է 80 դեպք։

«Ամենաբարձր ցուցանիշն այս պահին Սևան տարածաշրջանում է՝ Սևան քաղաքով։ Պարետատունը եկավ այն որոշման, որ պետք է Սևան քաղաքը փակել։ Մարզում այլ փակ համայնքներ չունենք։ Սևան քաղաքը փակվել է, որովհետև համայնքների հետ կապը շատ ակտիվ է և վերջին ցուցանիշները ցույց են տալիս, որ Սևանի տարբեր համայնքներում նոր դեպքեր են գրանցվում և միակ տարբերակը՝ Սևանը փակելն է, որ նոր օջախներ չառաջանան և եղածը վերահսկելով կարողանանք տանել դեպի մարում»,- ասաց նա։

Ավելի վաղ տեղեկացրել ենք, որ պարետ Տիգրան Ավինյանի որոշմամբ՝ Գեղարքունիքի մարզի Սևան քաղաքի ելումուտն արգելվել է։ Սահմանափակումը գործելու է մայիսի 25-ից մինչև հունիսի 3-ը ժամը 23։59-ը։

Ավելի վաղ՝ պարետի որոշմամբ, փակվել էր նաեւ Վարդենիսի ելումուտը, այս ռեժիմը տևել է ապրիլի 22-ից մինչև ապրիլի 28-ը։

Աղբյուր` Փաստինֆո