Փաստ ինֆո

Եկեք օրենսդրորեն ընդլայնենք Ձեր մանդատի շրջանակը, որպեսզի կարողանաք օրենսդրորեն ականջից բռնել այն տնտեսվարողներին, ովքեր փորձում են այս ֆորսմաժորային իրավիճակում ստանալ մուլտիպլիկատիվ էֆեկտով անբարո գերշահույթներ։ Ազգային ժողովում իր ելույթի ժամանակ այս մասին ասաց ԱԺ «Բարգավաճ Հայաստան» խմբակցության պատգամավոր Նաիրա Զոհրաբյանը։

«Երբ այդ մոնոպոլիստները դեղատներին մատակարարում էին դիմակներ ու դիմակները վաճառվում էին 20-30 դրամով, նրանք դրանով որևէ մեկին լավություն չէին անում, նրանք ունեին իրենց գերշահույթը։ Հիմա ունեն հարյուրապատիկ ավելի գերշահույթ։ Ժամանակը բավական երկար էր։ Փետրվարից սկսած ժամանակ ունեիք նրանցից պահանջել հաշվետվություն և պատասխանատվություն այս անոմա գերշահույթների համար»,-ասաց Նաիրա Զոհրաբյանը՝ նկատելով, որ նախկինում 20-30 դրամով վաճառվող դիմակները շատ ավելի որակյալ էին, քան այսօրվա դիմակները։

Պատգամավորը նշեց, որ այս տրամաբանությամբ յուրաքանչյուր ընտանիք ամսական նվազագույնը 60 հազար դրամ պետք է ծախսի դիմակ գնելու համար.

«Կա՛մ պետք է գրպանից հանի կեղտոտ, ճմռթած դիմակը, որն ուղղակի վիրուսի բուն է, և այդ դիմակը ճպպացի դեմքին ու ման գա։ Կարգավորեք այս ոլորտը, այլապես սա սոցիալական լուրջ լարվածություն է բերելու՝ հաշվի առնելով նաև Առողջապահության նախարարի վերջին հայտարարությունը, որ առնվազն երկու տարի դեռ մենք պետք է դիմակներ կրենք»,-ասաց Նաիրա Զոհրաբյանը։

Վերջինս ընդգծեց՝ այն ընտանիքները, որոնց մոտ աղքատություն են ֆիքսել, պետք է անվճար դիմակ ստանան։

Աղբյուր` Փաստինֆո